जिल्हाधिकारी रघुनाथ गावडे यांचे आवाहन
परभणी : राज्यात १५ ऑगस्ट २०२५ पर्यंत “हर घर तिरंगा”अभियान राबवले जात आहे. या उपक्रमात विद्यार्थी, युवक आणि नागरिकांनी मोठ्या संख्येने सहभागी व्हावे, असे आवाहन जिल्हाधिकारी रघुनाथ गावडे यांनी केले आहे. जिल्हाधिकारी कार्यालयात या अभियानाचा आढावा घेण्यासाठी झालेल्या बैठकीत ते बोलत होते. या बैठकीला अपर जिल्हाधिकारी डॉ. प्रताप काळे, निवासी उपजिल्हाधिकारी अनुराधा ढालकरी, उपविभागीय अधिकारी उदयसिंह भोसले यांच्यासह विविध विभागांचे प्रमुख उपस्थित होते. यावेळी जिल्हाधिकारी गावडे यांनी अभियानासाठी करण्यात आलेल्या नियोजनाची माहिती दिली:
पहिला टप्पा (८ ऑगस्टपर्यंत): या टप्प्यात स्वयंसेवकांनी harghartiranga.com या संकेतस्थळावर नोंदणी करावी. या स्वयंसेवकांद्वारे हे अभियान घरोघरी पोहोचवले जाणार आहे. शिक्षण विभागाने शाळा आणि महाविद्यालयांमध्ये जनजागृती करावी आणि विविध स्पर्धा आयोजित कराव्यात.
दुसरा टप्पा (८ ते १२ ऑगस्ट): या काळात तिरंगा महोत्सव, देशभक्तीपर गाण्यांचे कार्यक्रम, तिरंगा बाईक आणि सायकल रॅलींचे आयोजन करण्यात येणार आहे.
तिसरा टप्पा (१३ ते १५ ऑगस्ट): या टप्प्यात प्रत्येक घरावर राष्ट्रध्वज फडकवणे अपेक्षित आहे. घरांव्यतिरिक्त सर्व शासकीय, निमशासकीय, सहकारी आणि खासगी आस्थापनांमध्येही राष्ट्रध्वज फडकवला जावा.
स्वच्छता आणि स्पर्धांवर भर
यावर्षी “हर घर तिरंगा, हर घर स्वच्छता स्वतंत्रता का उत्सव, स्वच्छता के संग” हे घोषवाक्य आहे. त्यामुळे अभियानाअंतर्गत स्वच्छता मोहिमांवरही विशेष भर दिला जाणार आहे. प्रमुख शासकीय कार्यालये, महत्त्वाची स्थळे, पाणीसाठे आणि वारसा स्थळांवर तिरंगा रोषणाई करण्याचे निर्देश देण्यात आले आहेत.
याशिवाय, रांगोळी आणि राखी बनवण्याच्या स्पर्धांसारखे उपक्रम आयोजित केले जातील. जिथे स्पर्धा शक्य नाही तिथे कार्यशाळांचे आयोजन करावे. सर्व शासकीय संकेतस्थळांवर “हर घर तिरंगा” संबंधित मजकूर आणि लोगो वापरण्याचेही आवाहन करण्यात आले आहे.
या अभियानासाठी स्वयंसेवकांनी पुढे यावे, यासाठी एन.एस.एस. आणि महाविद्यालयीन विद्यार्थी तसेच इतर नागरिक harghartiranga.com या संकेतस्थळावर नोंदणी करू शकतात. “तिरंगा मेला” आणि तिरंग्यासोबत सेल्फी काढून अपलोड करण्यासारख्या उपक्रमांवरही लक्ष केंद्रित करण्याचे निर्देश देण्यात आले आहेत. अधिक माहिती, स्वयंसेवक नोंदणी आणि सेल्फी अपलोड करण्यासाठी https://harghartiranga.com या संकेतस्थळाला भेट देण्याचे आवाहन करण्यात आले आहे.
