परभणी : परभणी जिल्ह्याचे जिल्हाधिकारी आणि जिल्हा महावारसा समितीचे अध्यक्ष श्री. संजयसिंह चव्हाण यांना गुप्तेश्वर मंदिर, धारासुर येथे भेट देण्याचे निमंत्रण देण्यात आले. यावेळी त्यांना मंदिराच्या जीर्णोद्धार कार्याबद्दल सविस्तर माहिती देण्यात आली.
या भेटीदरम्यान, जिल्हाधिकाऱ्यांसमोर एक निवेदन सादर करण्यात आले. यामध्ये, निधी मंजूर होऊनही बऱ्याच काळापासून रखडलेल्या जनसुविधा केंद्राच्या कामाला अद्याप सुरुवात झाली नसल्याची बाब निदर्शनास आणून देण्यात आली. संबंधित विभागाला काम सुरू करण्याचे आदेश देण्याची विनंती निवेदनातून करण्यात आली. यावर जिल्हाधिकाऱ्यांनी आवश्यक माहिती घेऊन लवकरात लवकर काम सुरू करण्याचे आश्वासन दिले. तसेच, त्यांनी धारासुर येथील गुप्तेश्वर मंदिराला भेट देण्याची आणि मंदिराच्या जीर्णोद्धार कार्याची तसेच जनसुविधा केंद्राच्या जागेची प्रत्यक्ष पाहणी करण्याची ग्रामस्थांची विनंती मान्य केली. लवकरच भेट देण्याची ग्वाही त्यांनी दिली.
यावेळी जिल्हाधिकाऱ्यांना गुप्तेश्वर मंदिर, धारासुरची फोटो फ्रेम आणि पुष्पगुच्छ देऊन सन्मानित करण्यात आले. या प्रसंगी श्री. प्रताप कदम, श्री. निवृत्ती कदम, श्री. दगडूदादा जाधव, श्री. सुरेश जाधव, मंदिर शिल्प स्थापत्य अभ्यासक तथा गुप्तेश्वर मंदिर समिती सदस्य श्री. नागेश जोशी, श्री. सचिन साकूरकर आणि श्री. ऋषिकेश कदम यांची प्रमुख उपस्थिती होती.
