गोहेगाव ग्रामस्थांशी शिक्षणाधिकारी पोलास यांनी केली चर्चा, दोन शिक्षकांची प्रतिनियुक्ती
सेलू : दोन शिक्षकांच्या बदलीमुळे सेलू तालुक्यातील गोहेगाव येथील जिल्हा परिषद प्राथमिक शाळेतील पालक आणि ग्रामस्थांनी ९ सप्टेंबरपासून सुरू केलेले शाळा बहिष्कार आंदोलन सोमवारी, १५ सप्टेंबर रोजी मागे घेतले आहे. सोमवारी सायंकाळी उशिरापर्यंत शिक्षणाधिकारी (प्राथमिक) सुनील पोलास यांनी ग्रामस्थांशी चर्चा करून याप्रश्नी समाधानकारक मार्ग काढला.
शिक्षण विभागाने तत्काळ दोन शिक्षकांची प्रतिनियुक्ती केली आहे. त्यामुळे बहिष्कार आंदोलन मागे घेण्यात आले. शाळेतील जुने शिक्षक जे.ए.धामणगावे आणि जी.आर. बोरगावकर यांची बदली झाल्यामुळे आणि त्यांच्या जागी एस.ए. दिवटे आणि डी.एस.भांडे यांची नियुक्ती झाल्याने ग्रामस्थांमध्ये तीव्र नाराजी होती. नवीन दोन्ही शिक्षकांच्या नियुक्तीला ग्रामस्थांनी २० ऑगस्ट रोजीच आक्षेप घेतला होता. उत्कृष्ट शिक्षक द्या अशी मागणी करीत मुले शाळेत पाठविणार नसल्याची भूमिका घेऊन गावातील दक्षिणमुखी हनुमान मंदिर परिसरात साखळी उपोषण सुरू केले होते. तसेच सेलू तहसील कार्यालयासमोर विद्यार्थ्यांसह आमरण उपोषणाचा इशारा दिला होता. ९ सप्टेंबरपासून पालकांनी विद्यार्थ्यांना शाळेत पाठविणे बंद केले होते. त्यामुळे विद्यार्थ्यांचे शैक्षणिक नुकसान होऊ लागले. या प्रकरणाची दखल घेत सोमवारी शिक्षणाधिकारी सुनील पोलास, उपशिक्षणाधिकारी गजानन वाघमारे, गटशिक्षणाधिकारी मनोज चव्हाण आणि केंद्रप्रमुख नूर शेख यांनी गोहेगाव येथे भेट दिली. ग्रामस्थांशी चर्चा केली. यावेळी रामेश्वर गटकळ तसेच शालेय समितीचे पदाधिकारी व सदस्य उपस्थित होते. या चर्चेनंतर प्रशासनाने तत्काळ ज्ञानेश्वर पौळ आणि मधुकर कटारे या दोन शिक्षकांची प्रतिनियुक्ती केली. तसेच, बदली होऊन आलेले दिवटे आणि भांडे यांना रजेवर पाठवण्यात आले आहे. यामुळे ग्रामस्थांनी समाधान व्यक्त करत आंदोलन मागे घेतले, अशी माहिती सरपंच स्वाती रामेश्वर गटकळ आणि मुख्याध्यापक पंकज चव्हाण यांनी दिली.
