पुराचे पाणी शेतजमिनीत घुसले
परभणी : सेलू तालुक्यातील निम्न दुधना धरणाच्या पाणलोट क्षेत्रात जोरदार पाऊस सुरू असल्यामुळे मंगळवारी, १६ सप्टेंबर रोजी धरणातून पाण्याचा ३०,४१४ क्यूसेक (८६१.२२ क्यूमेक) इतका प्रचंड विसर्ग दुधना नदीपात्रात सोडण्यात आला. यामुळे नदीकाठच्या शेतशिवारात मोठ्या प्रमाणात पुराचे पाणी शिरले आहे. संपूर्ण पिके पाण्याखाली गेली आहेत.
पाणलोट क्षेत्रातील असंपादित शेतजमीनचा प्रश्न मागील चार वर्षांपासून निकाली काढण्यात आला नाही. त्यामुळे धरणामध्ये साठवण क्षमता ७५ टक्के एवढी मर्यादित करण्यात आली. पाणलोट क्षेत्रात मोठा पाऊस झाला की, धरणातून वारंवार विसर्ग करावा लागतो. याचा फटका लाभक्षेत्रातील शेतजमीन व पिकांना बसून शेतकऱ्यांचे प्रचंड नुकसान होत. जमीन खरडून जात आहेत. मंगळवारी दुधनेच्या पुराचे पाणी नदीकाठच्या खादगाव, गोमेवाकडी , काजळी रोहिणी, करडगाव, डिग्रस खुर्द आदी गावांच्या शेतशिवारात मोठ्या प्रमाणावर पाणी घुसले. शेतांना नदीचे स्वरूप प्राप्त झाले आहे. पिके पाण्याखाली जाऊन मोठे नुकसान झाले आहे.
