सेलू : पुणे येथील महाराष्ट्र राज्य कलाध्यापक संघ महामंडळाने आयोजित केलेल्या जिल्हास्तरीय ‘ऋतुरंग’ चित्रकला स्पर्धेत आहेर बोरगाव येथील नितीन माध्यमिक व उच्च माध्यमिक विद्यालयाने उल्लेखनीय यश मिळवले आहे. या स्पर्धेत शाळेच्या ४ विद्यार्थ्यांनी पारितोषिके पटकावली आहेत. शालेय स्तरावर झालेल्या या स्पर्धेत शिवकन्या कैलास मोगरे हिने प्रथम, सायली गंगाधर भोसले हिने द्वितीय, निकिता संजय बिल्हारे हिने तृतीय क्रमांक मिळवला. तेजश्री कैलास लिपणे हिला उत्तेजनार्थ पारितोषिक मिळाले आहे.
या सर्व गुणवंत विद्यार्थ्यांचा सत्कार महाराष्ट्र राज्य कलाध्यापक संघ महामंडळाचे राज्य सरचिटणीस दिगंबर बेंडाळे , जिल्हाध्यक्ष केशव लगड , जिल्हा सचिव अतुल सामाले आदी मान्यवरांच्या हस्ते स्मृतिचिन्ह, प्रमाणपत्र व पुष्पगुच्छ देऊन करण्यात आला. या कार्यक्रमात विद्यालयातील कलाध्यापक श्री संतोष ताल्डे यांनाही ‘ऋतुरंग कला गौरव पुरस्कारा’ने सन्मानित करण्यात आले. संस्थेचे अध्यक्ष राजेंद्र लहाने, मुख्याध्यापक सर्जेराव लहाने , तसेच सर्व शिक्षक आणि शिक्षकेतर कर्मचारी यांनी या यशाबद्दल कलाशिक्षक संतोष ताल्डे आणि सर्व विद्यार्थ्यांचे विशेष कौतुक केले.
