सेलू : गौरव सेवाभावी संस्था सेलू संचलित यासेर उर्दू प्राथमिक शाळा, सेलू येथील मुख्याध्यापक जावेद खान फेरोज खान पठाण यांना महाराष्ट्र प्रदेश काँग्रेस शिक्षक सेल यांच्या तर्फे राज्यस्तरीय आदर्श मुख्याध्यापक शिक्षक पुरस्कार जाहीर करण्यात आला आहे. परभणी जिल्ह्यातून या पुरस्कारासाठी त्यांची निवड झाली आहे.
१२ नोव्हेंबर रोजी मुंबई येथे टिळक भवन महाराष्ट्र काँग्रेस कमिटी सदन येथे या पुरस्काराचा सोहळा संपन्न होणार आहे. या सोहळ्यासाठी महाराष्ट्र प्रदेश काँग्रेसचे अध्यक्ष हर्षवर्धन सपकाळ, विजय नामदेवराव वडेट्टीवार, सत्यजित पाटील (गटनेते विधान परिषद काँग्रेस) तसेच इतर काँग्रेस पक्षाचे आमदार व खासदार उपस्थित राहणार आहेत. याशिवाय, प्रकाश भाऊ तायडे (कार्याध्यक्ष, महाराष्ट्र प्रदेश काँग्रेस शिक्षक सेल) आणि प्रकाश सोनवणे (प्रदेश अध्यक्ष, महाराष्ट्र प्रदेश काँग्रेस शिक्षक सेल) यांच्या प्रमुख उपस्थितीत हा पुरस्कार वितरण सोहळा येत्या रविवारी आयोजित करण्यात आला आहे.
राज्यभरातील विविध जिल्ह्यांमधून या सोहळ्यासाठी शिक्षकांची निवड करण्यात आली असून, परभणी जिल्ह्यातून जावेद खान फेरोज खान पठाण यांची निवड करण्यात आली आहे. संस्था अध्यक्ष तथा माजी न.प. सदस्य पठाण रहीम खान खैऊला खान यांनी त्यांच्या या निवडीबद्दल आनंद व्यक्त केला आहे. तसेच, मुख्याध्यापक अन्सारी अब्दुल रहीम, श्याम मचाले, संजय भोकरे, रहेमान पठाण, मोहम्मद रईस, मुस्ताक सर, मोरे सर आदींनी त्यांचे अभिनंदन केले आहे.
