पी.एस.घाडगे यांची माहिती, परभणीत मराठवाडा शिक्षक संघाच्या केंद्र कार्यकारिणीच्या बैठकीत महत्त्वपूर्ण निर्णय
परभणी : सन २०१३ नंतर शिक्षकपदी रुजू झालेल्या शिक्षकांना टी.ई.टी. (शिक्षक पात्रता परीक्षा) अनिवार्य करणे हे अन्यायकारक आणि मानसिक खच्चीकरण करणारे आहे. प्रस्थापित शिक्षण व्यवस्थेवर शासनाचाच विश्वास नसल्याचे हे द्योतक आहे आणि या निर्णयाविरुद्ध मराठवाडा शिक्षक संघ न्यायालयीन लढाई लढणार असल्याचा विश्वास मराठवाडा शिक्षक संघाचे मार्गदर्शक पी.एस.घाडगे यांनी दिला.
मराठवाडा शिक्षक संघाच्या केंद्र कार्यकारिणीची बैठक सोमवारी, २७ ऑक्टोबर २०२५ रोजी परभणी येथील औषधी भवनात पार पडली. त्या वेळी ते बोलत होते. यावेळी मराठवाडा शिक्षक संघाचे अध्यक्ष सूर्यकांत विश्वासराव यांनी शिक्षकांना सेवाशाश्वतीपासून सेवानिवृत्तीपर्यंतचे लाभ मिळवून देणारी मराठवाडा शिक्षक संघ ही मराठवाड्यातील आद्य शैक्षणिक चळवळ असल्याची भावना व्यक्त केली.
सरचिटणीस राजकुमार कदम यांनी राज्यात शिक्षणाचे खासगीकरण जोरात सुरू आहे, याला विरोध करण्याची आणि महात्मा फुले, राजर्षी शाहू, डॉ. आंबेडकरांनी ज्या सामान्य माणसाला शिक्षणाच्या प्रवाहात आणले ते शिक्षण वाचविण्याची गरज असल्याचे प्रतिपादन केले. परभणी जिल्हाध्यक्ष यशवंत मकरंद यांनी राज्याचा शिक्षण विभाग प्रश्नग्रस्त बनला असून, शिक्षकांवरील अन्याय, अत्याचार, शारीरिक, मानसिक व आर्थिक शोषणात वाढ होत आहे. मराठवाडा शिक्षक संघ अन्यायग्रस्त शिक्षकांच्या पाठीशी खंबीरपणे उभे राहणार असल्याच्या भावना व्यक्त केल्या.
बैठकीत छत्रपती संभाजीनगर विभाग पदवीधर मतदारसंघात मतदार नोंदणी जोमाने करण्याचा निर्णय घेण्यात आला.या बैठकीत परभणी जिल्हाध्यक्ष यशवंत मकरंद, जिल्हा सचिव निशांत हाके, केंद्र कार्यकारिणी सदस्य विक्रम कदम, रमेश सूर्यवंशी, नारायणराव कदम, भगवानराव पुर्णे, गणेश खंडागळे, संतोष साखरे यांनी उपस्थित कार्यकारिणी सदस्यांचे स्वागत केले. बैठकीच्या सुरुवातीला माजी शिक्षणाधिकारी बी.आर.कुंडगीर यांच्या हस्ते वृक्षारोपण करण्यात आले. प्रास्ताविक संतोष साखरे यांनी केले. सूत्रसंचालन अमित मोगल यांनी केले, तर आभार नारायणराव कदम यांनी मानले. या बैठकीस ज्ञानोबा वरवट्टे, के.बी.औताडे, विक्रम कदम, राजकुमार सूर्यवंशी, जयपाल शेरखाणे, कालिदास धपाटे, अशोक मस्कले, बी.एस.पुर्णे, गणपत राटोळे, बसवराज स्वामी, जी.व्ही.माने, संजय येळवंते, सुधाकर भडके, संग्राम सोळंके, जगन वाघमोडे यांच्यासह मराठवाड्यातील पदाधिकारी मोठ्या संख्येने उपस्थित होते.
