माखणी, पिंपळदरीत मुसळधार; परभणीत यंदा १२१ टक्के पाऊस
परभणी : गंगाखेड तालुक्यातील माखणी आणि पिंपळदरी या दोन महसूल मंडळात बुधवारी मुसळधार पाऊस झाला. माखणी येथे ६५.५ मिलीमीटर, तर पिंपळदरी येथे ६६ मिलीमीटर एवढ्या पावसाची नोंद करण्यात आली आहे. संपूर्ण जिल्ह्यातील वातावरण पूर्णतः बदलले आहे. मंगळवारी रात्री परभणी शहरासह जिल्ह्यात ठिकठिकाणी जोरदार पाऊस झाला आणि रात्री उशिरापर्यंत तो सुरू होता. गंगाखेड तालुक्यात पावसाचा जोर अधिक होता. बुधवार, २९ ऑक्टोबर रोजी सकाळपासून जिल्ह्यात ढगाळ वातावरण कायम होते. परभणी शहरात सकाळी रिमझिम पाऊस झाला आणि सायंकाळपर्यंत ढगाळ वातावरण कायम होते. बदलत्या हवामानाचा शेतपिकांना विशेषतः कापूस पिकाला जोरदार फटका बसला आहे.
परभणीत यंदा १२१ टक्के पाऊस
परभणी : २९ ऑक्टोबर २०२५ रोजी सकाळी १०.४० वाजेपर्यंतच्या आकडेवारीनुसार, परभणी जिल्ह्याने यंदा सरासरीपेक्षा अधिक पाऊस अनुभवला आहे. जिल्ह्याची जून महिन्यापासूनची आतापर्यंत सरासरीच्या १२१.०% इतका पाऊस नोंदवला गेला आहे.२९ ऑक्टोबर रोजी झालेल्या पावसामध्ये गंगाखेड तालुक्यातील पिंपळदरी मंडळात सर्वाधिक ६६.० मिलीमीटर आणि माखणी मंडळात ६५.५ मिलीमीटर पावसाची नोंद झाली. याशिवाय, पाथरी तालुक्यातील कसपुरी मंडळात ५५.३ मिलीमीटर आणि गंगाखेड तालुक्याच्या मुख्यालयाच्या मंडळातही ५५.३ मिलीमीटर पावसाची नोंद झाली आहे.जिल्ह्यात बहुतांश तालुक्यात सरासरीपेक्षा अधिक पाऊस झाला आहे. पावसाच्या प्रगतीनुसार (जून महिन्यापासून सरासरीच्या तुलनेत): पाथरी तालुक्यात १४०.८% , पालम तालुक्यात १४७.१% , पूर्णा तालुक्यात १३७.८% , जिंतूर तालुक्यात १२३.८% आणि गंगाखेड तालुक्यात १२३.७% इतका पाऊस झाला आहे. परभणी तालुक्यात १११.२% आणि सेलू तालुक्यात १०९.७% इतक्या पावसाची नोंद आहे. ऑक्टोबर महिन्याच्या सरासरीच्या तुलनेतही अनेक मंडळांमध्ये लक्षणीय पाऊस झाला आहे. पूर्णा तालुक्यातील चुडावा मंडळात ऑक्टोबरमधील प्रगती सर्वाधिक २८१.८% आहे. तर सोनपेठ तालुक्यातील आवळगाव मंडळात ही टक्केवारी २५७.१% पर्यंत पोहोचली आहे. जिल्ह्याची ऑक्टोबरमधील एकत्रित पावसाची प्रगती सरासरीच्या ११८.५% इतकी आहे.
