सेलू नगरपालिका निवडणूक : नेमून दिलेले कर्तव्य अचूकपणे पार पाडावीत : उदयसिंह भोसले
सेलू जि.परभणी : नगरपालिका सार्वत्रिक निवडणूक २०२५ अंतर्गत सेलू नगरपालिका निवडणुकीसाठी नियुक्त मतदान केंद्राध्यक्ष, मतदान अधिकारी आणि कर्मचाऱ्यांचे पहिले प्रशिक्षण बुधवारी, १९ नोव्हेंबर रोजी साई नाट्य मंदिरात उत्साहात पार पडले. भारत निवडणूक आयोग, राज्य निवडणूक आयोगाच्या निर्देशानुसार आणि जिल्हाधिकारी संजयसिंह चव्हाण यांच्या मार्गदर्शनात निवडणूक निर्णय अधिकारी उदयसिंह भोसले, सहायक निवडणूक निर्णय अधिकारी तथा तहसीलदार डॉ.शिवाजी मगर यांनी मार्गदर्शन केले. सहायक निवडणूक अधिकारी तथा मुख्याधिकारी तुकाराम कदम उपस्थित होते.
पारदर्शक आणि शिस्तबद्ध निवडणुकीसाठी प्रशासन सज्ज आहे. मतदान प्रक्रिया सुरळीत पार पडावी यासाठी सर्व नियुक्त अधिकारी, कर्मचारी यांनी त्यांना नेमुन दिलेले कर्तव्य अचूकपणे पार पाडावीत. सदर प्रकरणी कुठलीही टाळाटाळ करण्यात होऊ नये, याची खबरदारी घ्यावी, असे स्पष्ट आदेश निवडणूक निर्णय अधिकारी उदयसिंह भोसले यांनी दिले आहेत.
पहिल्या प्रशिक्षणात नियुक्त एकूण ३४० पैकी ३२० मतदान अधिकारी उपस्थित होते. द्वितीय प्रशिक्षण २५ नोव्हेंबर रोजी होणार असून १ डिसेंबर रोजी तिसरे प्रशिक्षण तहसील कार्यालय परिसरात आहे. तेथून सर्व साहित्य घेऊन पथके मतदान केंद्रावर रवाना होणार आहेत. २ डिसेंबर रोजी सकाळी साडेसात ते सायंकाळी साडेपाच या वेळेत मतदान प्रक्रिया पार पडणार आहे. ३ डिसेंबर रोजी मतमोजणी व निकाल आहे, अशी माहिती सहायक निवडणूक अधिकारी डॉ.शिवाजी मगर यांनी दिली. प्रशिक्षणात सर्व नियुक्त मतदान केंद्राध्यक्ष व मतदान अधिकारी यांना मास्टर ट्रेनर यांनी मतदान प्रक्रिया, यंत्र सिल करण्याबाबत मागदर्शन केले आणि त्यांचे हॅन्डऑन प्रशिक्षण घेण्यात आले.
