सेलूत विविध धार्मिक, सांस्कृतिक कार्यक्रम; २२४ वर्षांची परंपरा
सेलू जि.परभणी : सेलू शहराचे ग्रामदैवत आणि श्रीसंत साईबाबांचे सद्गुरू श्री गोपाळकृष्ण केशवराज बाबासाहेब महाराज (व्यंकुशहा) यांच्या २२४ व्या यात्रा महोत्सवास गुरुवारी, २७ नोव्हेंबरपासून प्रारंभ होत आहे. शुक्रवारी, ५ डिसेंबररोजी सांगता आहे. महोत्सवानिमित्त मंदिर परिसरात विविध धार्मिक, अध्यात्मिक आणि सांस्कृतिक कार्यक्रमांचे आयोजन करण्यात आले आहे. यानिमित्ताने दोन आठवडे मोठी यात्रा भरते.
नंदकुमार गोंदीकर महाराजांच्या रसाळ वाणीतून श्रीमद् भागवत कथेस गुरुवारपासून प्रारंभ होत आहे. सकाळी ९ ते १० संहिता वाचन, दुपारी १२ ते ५ कथेचे निरूपण, शालिग्राम मुळे यांचे गुरुवारी व शुक्रवार रात्री नऊ वाजता कीर्तन आहे. शनिवारी आणि रविवारी (२९ आणि ३० नोव्हेंबर) रोजी दीपाली कुलकर्णी यांचे रात्री ९ वाजता कीर्तन आहे. मार्गशीर्ष शुद्ध एकादशीला सोमवारी, एक डिसेंबर रोजी श्री गीता जयंती, श्री केशवराज बाबासाहेब महाराज यांच्या पुण्यतिथीनिमित्त सकाळी महाराजांच्या ओवीबद्ध चरित्राचे सामुदायिक पारायण, श्रीम‌द्भगवत् गीता पठण, सायंकाळी ‘श्रीं’ची आराधना, अभिषेक, महापूजा आहे. रात्री बालासाहेब नेब महाराज यांचे कीर्तन आहे. मंगळवारी, २ डिसेंबर रोजी दीपाली कुलकर्णी यांचे कीर्तन आहे. बुधवारी, ३ डिसेंबर रोजी रात्री पुरूषोत्तम महाराज वालूरकर यांचे हरिकीर्तन आहे. गुरुवारी (ता. चार) डिसेंबर रोजी श्री केशवराज बाबासाहेब महाराज (व्यंकुशहा) यांच्या यात्रेचा मुख्य दिवस आहे. त्यानिमित्त दुपारी १२ वाजता ‘श्री’ची महाआरती, दुपारी ३ वाजता ‘श्री’ची भव्य पालखी मिरवणूक काढण्यात येणार आहे. शुक्रवारी, ५ डिसेंबररोजी दुपारी चार वाजता भागवतकार सुनील महाराज आष्टीकर यांचे काल्याचे कीर्तन आहे. महोत्सवात लघुरुद्र अभिषेक करू इच्छिणाऱ्यांनी सुधीर मंडलिक यांच्याशी संपर्क साधावा तसेच विविध कार्यक्रमांत सहभागी व्हावे असे आवाहन केशव मंडलिक, वामन मंडलिक, पुरुषोत्तम मंडलिक आणि यात्रा समितीने केले आहे.
मंदिर परिसराला रोषणाई
यात्रा महोत्सवानिमित्त मंदिर व मंदिर परिसराला रंगरंगोटी, विद्युत रोषणाई करण्यात आली असून भाविकांमध्ये उत्साहाचे वातावरण आहे. ४ डिसेंबरपासून पुढे दोन आठवडे यात्रा भरते. यात्रेत विविध कापड, भांडणी, गृहपयोगी वस्तू, खानपान साहित्याची दुकाने, पाळणे, विविध मनोरंजनात्मक खेळाने यात्रा भरते. पंचक्रोशीतील तसेच दूरदूरच्या भाविकांच्या गर्दीने परिसर फुलूणार आहे.
