परभणीत वेध फाऊंडेशनचा उपक्रम
परभणी : वेध फाऊंडेशनतर्फे परभणी येथे आयोजित ‘मुलखावेगळी माणसं’ कार्यक्रमाला विद्यार्थी, पालक आणि शिक्षकांचा उत्स्फूर्त प्रतिसाद मिळाला.
या कार्यक्रमात भारतीय लष्कराचा सर्वोच्च शौर्य पुरस्कार परमवीरचक्र विजेते, ‘द हिरो ऑफ टायगर हिल’ कॅप्टन योगेंद्रसिंह यादव यांचा जिल्हाधिकारी संजयसिंह चव्हाण यांच्या हस्ते विशेष सत्कार करण्यात आला.
वसंतराव नाईक मराठवाडा कृषी विद्यापीठाच्या सभागृहात २३ नोव्हेंबर रोजी झालेल्या या कार्यक्रमात आपापल्या क्षेत्रात उल्लेखनीय कार्य केलेल्या पाच व्यक्तींना आमंत्रित करण्यात आले होते. विख्यात सुसंवादिनी धनश्री प्रधान दामले यांनी या पाच विभूतींची मुलाखत घेतली. याद्वारे उपस्थितांना त्यांच्या प्रेरणादायी जीवनप्रवासाची माहिती मिळाली.
या कार्यक्रमात परमवीरचक्र विजेते कॅप्टन योगेंद्रसिंह यादव यांच्यासह बीजमाता पद्मश्री राहीबाई पोपेरे, व्हाईट आर्मी कोल्हापूरचे अशोक रोकडे, आंतरराष्ट्रीय धावपटू ज्योती गवते आणि ‘बर्डमन’ सुमेध वाघमारे यांचा सहभाग होता.
कॅप्टन योगेंद्रसिंह यादव यांनी कारगिल युद्धातील अवघ्या १९ वर्षांच्या वयातील आपल्या शौर्यगाथेने उपस्थितांना स्तब्ध केले. पद्मश्री राहीबाई पोपेरे यांनी पारंपरिक बियाणे वापरण्याचे आणि निसर्ग संवर्धनाचे महत्त्व सांगितले. तर ज्योती गवते यांनी आपले ऑलिम्पिकमधील सुवर्णपदक जिंकण्याचे स्वप्न व्यक्त केले. विविध क्षेत्रांतील या दिग्गजांचे अनुभव ऐकून तरुणाईला प्रोत्साहन मिळाले.
