सेलूतील सभेत माजी खासदार इम्तियाज जलील यांचे आवाहन
परभणी : सेलू नगरपालिका निवडणुकीच्या प्रचारासाठी एमआयएम पक्षाचे महाराष्ट्र प्रदेश अध्यक्ष तथा माजी खासदार इम्तियाज जलील यांची जाहीर सभा गुरुवारी ,२७ नोव्हेंबर रोजी सेलू शहरातील आठवडी बाजार परिसरात झाली. आपल्या भाषणात माजी खासदार इम्तियाज जलील यांनी देशासह राज्यात मुस्लिम समाजावर होणारे अन्याय-अत्याचार रोखण्यासाठी आणि न्याय मिळावा यासाठी एमआयएम पक्षाच्या उमेदवारांना निवडून देण्याचे आवाहन केले. राज्यात सध्या सरकारमध्ये गुंड प्रवृत्तीचे लोक अधिक असल्याने हे महाराष्ट्रातील ‘गुंड्यांचे सरकार’ असल्याचा आरोप त्यांनी केला. तसेच, सेलू नगरपालिका निवडणुकीतील प्रमुख राजकीय नेत्यांच्या ‘अभद्र युती’चा त्यांनी चांगला समाचार घेतला. यावेळी मंचावर जिल्हाध्यक्ष मोहम्मद गौस झैन, वसीम अहेमद, मोहम्मद उमेदवार तथा तालुका अध्यक्ष ॲड. शेख वहीद, अबरार बेग मिर्झा, शेख महेबुब, शेख सिराज, शेख महेमूद यांच्यासह पक्षाचे पदाधिकारी, कार्यकर्ते आणि मुस्लिम समाज बांधव मोठ्या संख्येने उपस्थित होते.
