सेलूत स्वीप अंतर्गत उपक्रम
सेलू : सेलू नगर परिषद सार्वत्रिक निवडणूक २०२५ अंतर्गत SVEEP मतदार जनजागृती उपक्रमांतर्गत शिक्षण विभाग व पंचायत समिती सेलू तर्फे आयोजित ‘मोटार सायकल रॅली’ मोठ्या उत्साहात आणि शिस्तबद्धरीत्या पार पडली. लोकशाही मजबूत करण्यासाठी मतदारांनी सजग राहून मतदानाचा हक्क बजावावा या प्रमुख उद्देशाने ही रॅली आयोजित करण्यात आली होती.
रॅलीसाठी पोलीस निरीक्षक दीपक बोरसे यांच्या बंदोबस्तात काटेकोर नियोजन करण्यात आले. रॅलीच्या नियोजनात पोलिस विभागाचे विशेष सहयोग लाभले.
या उपक्रमाला निवडणूक निरीक्षक राजेशजी काटकर, निवडणूक निर्णय अधिकारी उदयसिंह भोसले, सहायक निवडणूक निर्णय अधिकारी शिवाजी मगर, सहा. निवडणूक निर्णय अधिकारी तुकाराम कदम, गटविकास अधिकारी उदय जाधव, प्रभारी गटशिक्षणाधिकारी गजानन वाघमारे, स्वीप नोडल अधिकारी गणेश शिंदे यांचे मार्गदर्शन लाभले. रॅलीत शिक्षक, शिक्षकेतर कर्मचारी, विद्यार्थी, स्वयंस्फूर्तीने आलेले नागरिक आणि विविध संस्थांचे प्रतिनिधी मोठ्या संख्येने सहभागी झाले. “आपले मत आपला हक्क”, “मतदान करूया – जबाबदारी पार पाडूया”, “लोकशाही बळकट करण्यासाठी मतदान आवश्यक” अशा घोषणांनी संपूर्ण शहरात जागृतीचे वातावरण निर्माण झाले. नागरिकांनी या उपक्रमाचे मनापासून कौतुक केले. आगामी निवडणुकीत सेलू शहरातील मतदार मोठ्या प्रमाणात मतदान करून लोकशाहीला बळकटी देतील, असा विश्वास व्यक्त करण्यात आला.
