टाटा इन्स्टिट्यूट ऑफ सोशल सायन्सेसतर्फे देशभरातील ५० शिक्षकांमध्ये समावेश
सेलू : शिक्षण क्षेत्रात उल्लेखनीय कार्य करणारे आणि नवनवीन उपक्रमांच्या माध्यमातून विद्यार्थ्यांच्या सर्वांगीण विकासासाठी झटणारे उपक्रमशील शिक्षक संतोष सकनूर (जि. प. प्राथमिक शाळा, खवणे पिंपरी, ता. सेलू, जि. परभणी) यांची प्रतिष्ठित ‘TISS – उमंग फेलोशिप २०२५’ साठी निवड झाली आहे. टाटा इन्स्टिट्यूट ऑफ सोशल सायन्सेस (TISS), मुंबई तर्फे उत्कृष्ट, नवोन्मेषी आणि विद्यार्थी-केंद्रित कार्य करणाऱ्या शिक्षकांना ही बहुमानाची फेलोशिप दिली जाते. या फेलोशिपसाठी देशभरातून आलेल्या हजारो अर्जदारांमधून केवळ ५० (पन्नास) शिक्षकांची निवड करण्यात आली आहे, त्यामध्ये सकनूर यांचा समावेश आहे. सकनूर हे शाळेत तंत्रज्ञानाधारित शिक्षण, विद्यार्थीकेंद्री उपक्रम आणि आनंददायी शिकवण यासाठी ओळखले जातात. उमंग फेलोशिपमुळे त्यांना शैक्षणिक क्षमता, अभिनव अध्यापन पद्धती आणि नेतृत्वगुण वाढवण्याची संधी मिळणार आहे. त्यांच्या या कामगिरीबद्दल शाळेचे मुख्याध्यापक गिरीष कुलकर्णी, शिक्षक संजीवकुमार साखरे, ज्ञानोबा कटारे, केशव बेले, कीर्ती आंबेकर, नवनाथ सोळंके, आत्मलिंग लांडगे, सचिन आठवले, संतोष पडोळे, तसेच शाळा व्यवस्थापन समिती अध्यक्ष नितीन चव्हाण, उपाध्यक्ष अशोक मुळे, सरपंच सुभाषराव चव्हाण, व्यंकटराव चव्हाण, पालक आणि ग्रामस्थांनी त्यांचे अभिनंदन करून पुढील वाटचालीस शुभेच्छा दिल्या आहेत.
