राष्ट्रीय बाल स्वास्थ्य कार्यक्रमांतर्गत सेलूत शिबिर; डॉक्टरांनी केले मार्गदर्शन
सेलू : येथील गौरव सेवाभावी संस्था संचलित यासेर उर्दू प्राथमिक शाळा, गुलमोहर कॉलनी येथे राष्ट्रीय बाल स्वास्थ्य कार्यक्रमांतर्गत शालेय आरोग्य तपासणी शिबिर गुरुवार १८ डिसेंबर रोजी उत्साहात पार पडले. या शिबिरासाठी उपजिल्हा रुग्णालयातील डॉ. गणेश मुळे, डॉ. आलेश भुरेवार, डॉ. सोनाली जाधव आणि डॉ. सचिन गायकवाड यांची प्रमुख उपस्थिती होती.या शिबिरामध्ये शाळेतील इयत्ता पहिली ते सातवीमधील सर्व विद्यार्थ्यांची सखोल आरोग्य तपासणी करण्यात आली. तपासणीदरम्यान सर्दी, खोकला, ताप यांसारख्या किरकोळ आजारांनी ग्रस्त असलेल्या विद्यार्थ्यांना तातडीने औषधोपचार देण्यात आला. केवळ तपासणी न करता तज्ज्ञांनी विद्यार्थ्यांना आरोग्याबाबत मोलाचे मार्गदर्शनही केले. डॉ. भुरेवार यांनी उत्तम आरोग्याचे महत्त्व आणि योग्य खानपान यावर प्रकाश टाकला, तर डॉ.सोनाली जाधव यांनी हिरव्या पालेभाज्या व फळे खाण्याचे फायदे सांगितले. डॉ .गणेश मुळे यांनी विद्यार्थ्यांशी संवाद साधताना निरोगी राहण्यासाठी रोजच्या आहारात फळे, दूध आणि अंडी यांचा समावेश करणे किती आवश्यक आहे, हे पटवून दिले.याप्रसंगी संस्थेचे अध्यक्ष रहीम खान पठाण आणि मुख्याध्यापक जावेद खान उपस्थित होते. शाळेच्या वतीने व्यस्त दिनचर्येतून वेळ काढून मुलांच्या आरोग्याची काळजी घेणाऱ्या सर्व डॉक्टरांचे आभार मानण्यात आले. कार्यक्रमाच्या यशस्वीतेसाठी सहशिक्षक सय्यद इमरान, सय्यद अजीम, तहेमिना खान, नजमा पठाण, माविया हाश्मी, सय्यद अमन, शेख साजिद, सीमा खान, नफिसा बाजी यांनी विशेष परिश्रम घेतले.
