गंगाखेड, जिंतूर, सेलू, मानवत, पाथरी, सोनपेठ आणि पूर्णा येथे कडेकोट बंदोबस्त
परभणी : जिल्ह्यातील गंगाखेड, जिंतूर, सेलू, मानवत, पाथरी, सोनपेठ आणि पूर्णा या मतदारसंघांतील नगरपरिषद सार्वत्रिक निवडणुकीची मतमोजणी रविवार, २१ डिसेंबर रोजी होणार आहे. या निवडणुकीसाठी २ डिसेंबर रोजी मतदान पार पडले होते. मतमोजणीची संपूर्ण प्रक्रिया शांततेत, निर्भय आणि न्याय वातावरणात पार पाडण्यासाठी तसेच कायदा व सुव्यवस्था अबाधित राखण्यासाठी जिल्हादंडाधिकारी तथा जिल्हाधिकारी संजयसिंह चव्हाण यांनी मतमोजणी केंद्रांच्या परिसरात भारतीय नागरिक सुरक्षा संहिता-२०२३ चे कलम १६३ लागू केले आहे.
जिल्ह्यातील नगरपरिषदनिहाय मतमोजणी पुढील ठिकाणी होणार आहे: गंगाखेड येथील उपविभागीय अधिकारी कार्यालयाची नवीन इमारत, जिंतूर येथील श्री. गुरु नथ्थुराम म. केहाळकर शासकीय औद्योगिक प्रशिक्षण संस्था, सेलू येथील उपविभागीय अधिकारी कार्यालय, मानवत येथील तहसील कार्यालय, पाथरी येथील सोनपेठ रोडवरील औद्योगिक प्रशिक्षण संस्था, तसेच सोनपेठ आणि पूर्णा येथील तहसील कार्यालयात २१ डिसेंबर रोजी सकाळी १० वाजेपासून मतमोजणीला सुरुवात होणार आहे.
भारतीय नागरिक सुरक्षा संहिता-२०२३ चे कलम १६३ अन्वये मतमोजणी केंद्राच्या १०० मीटर परिसरात सर्व पक्ष कार्यालये, उमेदवारांचे मंडप, सर्व दुकाने, मोबाईल, कॉर्डलेस फोन, पेजर, वायरलेस सेट, ध्वनीक्षेपके, सर्व प्रकारचे फेरीवाले आणि इतर इलेक्ट्रॉनिक उपकरणांवर बंदी घालण्यात आली आहे. यासोबतच निवडणुकीच्या कामाव्यतिरिक्त खाजगी वाहने आणि अनधिकृत व्यक्तींना या परिसरात प्रवेशास प्रतिबंध करण्यात आला आहे. हे आदेश २१ डिसेंबर २०२५ रोजी सकाळी ६.०० वाजेपासून ते मतमोजणीची प्रक्रिया संपेपर्यंत अंमलात राहणार आहेत.
