तामिळनाडू येथे होणाऱ्या ६९ व्या राष्ट्रीय शालेय स्पर्धेची जबाबदारी
परभणी : तामिळनाडू राज्यातील पेरंबलूर येथे २६ ते ३० डिसेंबर दरम्यान आयोजित ६९ व्या राष्ट्रीय शालेय टेबल टेनिस क्रीडा स्पर्धेसाठी महाराष्ट्र संघाची घोषणा करण्यात आली आहे. या स्पर्धेत सहभागी होणाऱ्या १७ वर्षांखालील मुलींच्या महाराष्ट्र राज्य संघाचे प्रशिक्षक म्हणून परभणीचे चेतन किशनराव मुक्तावार यांची निवड करण्यात आली आहे. शालेय खेळ महासंघाद्वारे या राष्ट्रीय स्पर्धेचे आयोजन करण्यात आले आहे.चेतन मुक्तावार सध्या जिल्हा क्रीडा अधिकारी कार्यालय परभणी येथे टेबल टेनिस प्रशिक्षक म्हणून कार्यरत आहेत. त्यांच्या मार्गदर्शनाखाली आजवर अनेक राज्य आणि राष्ट्रीय स्तरावरील खेळाडू तयार झाले असून, त्यांच्या प्रदीर्घ अनुभवाचा फायदा आता महाराष्ट्र संघाला मिळणार आहे.या निवडीबद्दल जिल्हा क्रीडा अधिकारी गीता साखरे, क्रीडा मार्गदर्शक संजय मुंडे, तालुका क्रीडा अधिकारी कल्याण पोले आणि क्रीडा अधिकारी रोहन औंढेकर यांनी त्यांचे अभिनंदन केले. तसेच सुयश नाटकर, मुख्य लिपिक रमेश खुणे, परभणी क्लबचे सचिव विवेक नावंदर, सहसचिव लाटकर, जिल्हा संघटनेचे सचिव गणेश माळवे आणि कोषाध्यक्ष माधव शेजुळ यांच्यासह जिल्ह्यातील सर्व खेळाडू, संघटक व पालकांनी मुक्तावार यांना पुढील वाटचालीस शुभेच्छा दिल्या आहेत.
