डॉ.संजय रोडगे यांचे विद्यार्थ्यांना आवाहन, प्रिन्स इंग्लिश स्कूलमध्ये गुणवंत विद्यार्थ्यांचा सत्कार
सेलू : येथील श्रीराम प्रतिष्ठान संचलित प्रिन्स इंग्लिश स्कूलमध्ये विविध स्पर्धा परीक्षा आणि क्रीडा क्षेत्रात यश मिळवलेल्या गुणवंत विद्यार्थ्यांचा सत्कार सोहळा २० डिसेंबर रोजी उत्साहात पार पडला. प्रेसिडेन्सीयल टेस्ट, डॉ. होमी भाभा परीक्षा तसेच तालुकास्तरीय विज्ञान प्रदर्शन व क्रीडा स्पर्धेत या विद्यार्थ्यांनी नेत्रदीपक यश संपादन केले होते. या विद्यार्थ्यांचा गौरव श्रीराम प्रतिष्ठानचे संस्थापक अध्यक्ष डॉ. संजय रोडगे यांच्या हस्ते करण्यात आला.याप्रसंगी श्रीराम प्रतिष्ठानच्या सचिव डॉ. सविता रोडगे, प्रशासकीय अधिकारी प्रा. महादेव साबळे आणि शाळेचे प्राचार्य कार्तिक रत्नाला यांची प्रमुख उपस्थिती होती. या कार्यक्रमाला शिक्षक, पालक आणि विद्यार्थी मोठ्या संख्येने उपस्थित होते.आपल्या मनोगतात डॉ. संजय रोडगे यांनी तंत्रज्ञानाच्या युगात कृत्रिम बुद्धिमत्तेचे महत्त्व अधोरेखित केले. विद्यार्थ्यांनी या तंत्रज्ञानाशी जुळवून घेत त्याचा वापर जबाबदारीने आणि सकारात्मक पद्धतीने करावा, असे त्यांनी स्पष्ट केले. भविष्यातील करिअरसाठी तंत्रज्ञान समजून घेणे काळाची गरज असल्याचेही त्यांनी सांगितले. शाळेमध्ये प्रशिक्षित शिक्षकांच्या मार्गदर्शनाखाली रोबोटिक्स लॅबमध्ये विद्यार्थ्यांना प्रत्यक्ष प्रशिक्षण दिले जात असून, पालकांनी या आधुनिक सुविधांची दखल घ्यावी, असे आवाहन त्यांनी केले.कार्यक्रमात विद्यार्थ्यांच्या शैक्षणिक, वैज्ञानिक आणि क्रीडा क्षेत्रातील यशाचे मान्यवरांनी कौतुक केले. सर्व यशस्वी विद्यार्थ्यांचे अभिनंदन करून त्यांना पुढील वाटचालीस शुभेच्छा देण्यात आल्या.
