पहिला निकाल सकाळी ११ वाजेपर्यंत, १३ टेबलवर होणार प्रक्रिया; नगराध्यक्षांसह १३ प्रभागांच्या निकालाकडे लक्ष
सेलू : सेलू नगर पालिकेच्या नगराध्यक्षांसह १३ प्रभागांसाठी झालेल्या निवडणुकीची मतमोजणी रविवारी, २१ डिसेंबर रोजी सकाळी १० वाजता सुरू होणार आहे. प्रशासनाने मतमोजणीची सर्व तयारी पूर्ण केली असून, पहिला निकाल सकाळी ११ वाजेपर्यंत जाहीर होण्याची शक्यता आहे. या निकालामुळे उमेदवारांसह मतदारांची उत्सुकता शिगेला पोहोचली आहे.
७२ कर्मचाऱ्यांची नियुक्ती
मतमोजणीसाठी एकूण १३ टेबलची व्यवस्था करण्यात आली असून, एका टेबलवर ३ ते ४ कर्मचारी नियुक्त केले आहेत. निवडणूक प्रक्रियेसाठी एकूण ७२ कर्मचाऱ्यांचा ताफा तैनात असेल. मतमोजणीच्या ५ फेऱ्या होणार असून, प्रभागनिहाय निकालासोबतच नगराध्यक्षपदाच्या उमेदवारांना मिळालेली मतेही जाहीर केली जातील. सर्वात शेवटी नगराध्यक्षपदाचा अधिकृत निकाल जाहीर होईल, अशी माहिती निवडणूक विभागाचे गजानन इनामदार यांनी दिली.
पोलिसांचा कडक बंदोबस्त
मतमोजणीच्या पार्श्वभूमीवर शहरात चोख पोलीस बंदोबस्त तैनात करण्यात आला आहे. जिल्हा पोलीस अधीक्षक रवींद्रसिंह परदेशी यांच्या मार्गदर्शनाखाली १ उपविभागीय पोलीस अधिकारी, १ पोलीस निरीक्षक, ११ उपनिरीक्षक, ६३ पोलीस अंमलदार आणि १०० गृहरक्षक दलाचे जवान असा एकूण २०० जणांचा फौजफाटा तैनात असेल, अशी माहिती पोलीस निरीक्षक दीपक बोरसे यांनी दिली.
धक्कादायक निकालाचे संकेत
नगरसेवक पदाच्या २६ जागा आणि लोकनियुक्त नगराध्यक्षपदासाठी ही निवडणूक पार पडली. मतदानाचा वाढलेला टक्का आणि चुरशीच्या लढतींमुळे विजयाबाबत अनेक तर्कवितर्क लावले जात आहेत. भाजप, काँग्रेस शहर विकास आघाडी, राष्ट्रवादी काँग्रेस (शरदचंद्र पवार पक्ष), शिवसेना आणि अपक्ष उमेदवारांनी आपापल्या विजयाचे दावे केले आहेत. काही प्रभागांमधील अटीतटीच्या लढतींमुळे राजकीय वातावरण चांगलेच तापले आहे.
