शहराच्या सर्वांगीण विकासासाठी कटिबद्ध राहण्याची बोराडे यांची ग्वाही
सेलू : भारतीय जनता पक्षाच्या नवनिर्वाचित नगरसेवकांची बैठक नुकतीच पार पडली. या बैठकीत सेलू नगरपालिकेत भारतीय जनता पक्षाच्या गटनेतेपदी नगरसेवक साईराज बोराडे यांची सर्वानुमते निवड करण्यात आली आहे. या निवडीमुळे भाजप गटात उत्साहाचे वातावरण आहे. साईराज बोराडे हे तरुण, अभ्यासू आणि सक्रिय कार्यकर्ते म्हणून ओळखले जातात. प्रभाग क्रमांक १ मधून बोराडे यांनी दणदणीत विजय मिळवत पहिल्यांदाच पालिकेत एंट्री मारली आहे. गटनेतेपदाची जबाबदारी स्वीकारताना साईराज बोराडे यांनी पक्षाच्या सर्व नगरसेवकांना सोबत घेऊन शहराच्या सर्वांगीण विकासासाठी काम करण्याचा संकल्प व्यक्त केला. नागरिकांच्या मूलभूत सुविधांसाठी तसेच नगरपालिका कारभारात पारदर्शकता आणण्यासाठी आपण कटिबद्ध राहू, असे त्यांनी यावेळी सांगितले. या निवडीबद्दल भाजपच्या पदाधिकाऱ्यांनी व कार्यकर्त्यांनी साईराज बोराडे यांचे अभिनंदन केले आहे. याबद्दल भाजपच्या वतीने त्यांचा सत्कार करण्यात आला. नगराध्यक्ष मिलिंद सावंत, तालुकाध्यक्ष गणेश काटकर, शहराध्यक्ष अशोक शेलार आदींसह नगरसेवक व पदाधिकारी उपस्थित होते.
