संगीतरत्न हरिभाऊ चारठाणकर यांच्या स्मृतीनिमित्त दोन दिवसीय स्वर सोहळा
सेलू : येथील देवगिरी संगीत प्रतिष्ठानच्या वतीने संगीतरत्न हरिभाऊ चारठाणकर संगीत महोत्सवाचे आयोजन करण्यात आले आहे. शनिवार, १० जानेवारी आणि रविवार, ११ जानेवारी २०२६ रोजी हा महोत्सव रंगणार असून दररोज सायंकाळी ५:३० वाजता कार्यक्रमाची सुरुवात होईल. सेलू येथील साई नाट्यगृह या ठिकाणी हा स्वर सोहळा पार पडणार आहे.महोत्सवाचे उद्घाटन सुरमणी डॉ. कमलाकर परळीकर यांच्या हस्ते होणार आहे. पहिल्या दिवशी शनिवारी लातूर येथील सायली टाक आणि मुंबई येथील सायली तळवलकर यांचे शास्त्रीय गायन होणार आहे. त्यानंतर पुणे येथील नितीश पुरोहित यांचे सरोद वादन रसिकांना ऐकता येईल.कार्यक्रमाच्या दुसऱ्या दिवशी, रविवारी छत्रपती संभाजीनगर येथील मृगनयनी सिस्टर्स यांचे भरतनाट्यम सादरीकरण होईल. त्यानंतर छत्रपती संभाजीनगरचे वैभव पांडे यांचे गायन आणि मुंबई येथील किशोर पांडे यांचे एकल तबला वादन होईल. महोत्सवाची सांगता हुबळी येथील कुमार मर्डूर यांच्या गायनाने होणार आहे. या सर्व कलाकारांना शांतीभूषण देशपांडे, प्रशांत जोशी, यश खडके, प्रशांत गाजरे आणि जगमित्र लिंगाडे हे साथसंगत करणार आहेत.संगीत महोत्सव संयोजन समितीने या महोत्सवाचे आयोजन केले असून परिसरातील संगीतप्रेमींनी या सुरावटींचा आनंद घेण्यासाठी उपस्थित राहावे, असे आवाहन मुख्य संयोजक महेश खारकर व मोहन खापरखुंटीकर आणि देवगिरी संगीत प्रतिष्ठानच्या वतीने करण्यात आले आहे.
