हेमंतराव आडळकर, विनोद बोराडे, अशोक काकडे स्वीकृत सदस्य
सेलू : सेलू नगरपालिका निवडणुकीतील नवनिर्वाचित सदस्यांच्या बुधवारी, १४ जानेवारी २०२६ रोजी नगराध्यक्ष मिलिंद सावंत यांच्या अध्यक्षतेखाली आयोजित पहिल्या सर्वसाधारण सभेत उपाध्यक्ष आणि तीन स्वीकृत सदस्यांच्या निवडी बिनविरोध पार पडल्या. उपाध्यक्षपदी भारतीय जनता पक्षाचे गटनेते साईराज मुकेशराव बोराडे, तर स्वीकृत सदस्य म्हणून साईबाबा बँकेचे अध्यक्ष तथा माजी नगराध्यक्ष हेमंतराव आडळकर (कॉंग्रेस) , माजी नगराध्यक्ष विनोद हरिभाऊ बोराडे आणि जिपचे माजी सभापती अशोक आण्णासाहेब काकडे ( भाजप) यांचीही बिनविरोध निवड करण्यात आली आहे. मुख्याधिकारी तुकाराम कदम यांनी ही माहिती दिली.
उपाध्यक्षपदासाठी साईराज बोराडे यांचा एकमेव अर्ज दाखल झाल्याने त्यांची बिनविरोध निवड झाली. सेलू पालिकेची एकूण सदस्य संख्या २६ आहे. भारतीय जनता पक्षाचे नगराध्यक्षासह संख्याबळ एकूण १५ आहे. त्यामुळे त्यांचे दोन, तर कॉंग्रेसचे एकूण सात सदस्य आहेत. त्यांचा एक असे एकूण तीन स्वीकृत सदस्यांची निवड करण्यात आली आहे, असे मुख्याधिकारी तुकाराम कदम यांनी पत्रकार परिषदेत सांगितले. नवनिर्वाचित सदस्यांचा सत्कार करण्यात आला. सभेला सर्व नवनिर्वाचित सदस्य, उपमुख्याधिकारी बी.एस.चव्हाण, एन.आर.दायमा, विजय शहाणे, मोहंमद युनुस आदींची उपस्थिती होती.
