‘अमृत रेल्वे स्थानक’ योजनेतून २५ कोटींचा निधी मंजूर; संतभूमीच्या ओळखीसह आधुनिक सुविधा मिळणार
सेलू : पंतप्रधान अमृत रेल्वे स्थानक विकास योजने अंतर्गत सेलू रेल्वे स्थानकाच्या नूतनीकरणाचे काम वेगाने सुरू असून, येत्या सहा महिन्यात या स्थानकाचा संपूर्ण कायापालट होणार आहे. जून २०२३ मध्ये पंतप्रधान नरेंद्र मोदी यांच्या हस्ते ऑनलाइन पद्धतीने आणि विद्यमान पालकमंत्री मेघना साकोरे-बोर्डीकर यांच्या प्रमुख उपस्थितीत या कामाचा शुभारंभ झाला होता. या सर्व विकासकामांसाठी केंद्र सरकारने २५ कोटी रुपयांचा निधी मंजूर केला आहे.
या योजने अंतर्गत रेल्वे स्थानकावर अत्याधुनिक लिफ्ट, एस्केलेटर (स्वयंचलित जिना), प्लॅटफॉर्मची उंची वाढविणे, आधुनिक उपहारगृह, स्वयंरोजगार स्टॉल आणि सुसज्ज प्रवासी प्रतीक्षा हॉल यांसारख्या सुविधा उपलब्ध करून दिल्या जाणार आहेत. स्थानकाच्या सौंदर्यीकरणासाठी दर्शनीय भिंतीवर वालूर येथील ऐतिहासिक अष्टकोणी बारवचे (स्टेपवेल) रेखाचित्र साकारले जाणार आहे.
विशेष म्हणजे, सेलूच्या संतभूमीची ओळख जपण्यासाठी स्थानकावर सद्गुरू श्री केशवराज बाबासाहेब महाराज, श्री संत साई बाबा, श्री संत गोविंद बाबा, श्रीक्षेत्र सिमुर्गव्हाण माऊली उपपीठ नानीज धाम इत्यादी संतांची चित्रे लावली जाणार आहेत. तसेच परिसरातील इतर धार्मिक व पर्यटन स्थळांची माहिती नकाशासह प्रदर्शित केली जाईल. रेल्वे स्थानकाचे प्रवेशद्वार आणि कमान तीर्थक्षेत्राच्या दर्जाला साजेसे उभारण्यात येणार असून, ही सर्व कामे येत्या सहा महिन्यात पूर्ण होतील, अशी माहिती यावेळी देण्यात आली.
“अनेक वर्षांचे सेलू शहराचे एक अद्ययावत रेल्वे स्टेशनचे स्वप्न आता पूर्ण होणार आहे. येथे अनेक संत महात्म्यांची चित्रे लावण्यात येणार असल्याने सेलू शहराची ‘संतांची भूमी’ ही ओळख अधिक दृढ होईल.” शिवनारायण मालाणी, अध्यक्ष, प्रवासी संघ
