पालकमंत्री मेघना साकोरे-बोर्डीकर : परभणीत ७७ वा प्रजासत्ताक दिन उत्साहात; दादा लाड यांच्या पद्मश्री पुरस्काराचा गौरव
परभणी : प्रजासत्ताक दिनानिमित्त सोमवारी, २६ जानेवारी रोजी येथील प्रियदर्शनी इंदिरा गांधी स्टेडियमवर आयोजित मुख्य शासकीय ध्वजारोहण सोहळ्यात राज्याच्या सार्वजनिक आरोग्य राज्यमंत्री तथा जिल्ह्याच्या पालकमंत्री मेघना साकोरे-बोर्डीकर यांनी देशाला सामर्थ्यशाली बनविण्याचे आवाहन केले. २६ जानेवारी १९५० रोजी भारत प्रजासत्ताक झाला आणि खरी सत्ता प्रजेच्या हाती सोपविण्यात आली, असे गौरवद्गार त्यांनी यावेळी काढले.
या सोहळ्यास जिल्हाधिकारी संजयसिंह चव्हाण, पोलीस अधीक्षक रवींद्रसिंह परदेशी, जिल्हा परिषदेचे मुख्य कार्यकारी अधिकारी नतीशा माथूर यांच्यासह स्वातंत्र्यसैनिक आणि विविध विभागांचे अधिकारी उपस्थित होते. परभणीचे सुपुत्र श्रीरंग ऊर्फ दादा लाड यांना कृषी क्षेत्रातील उल्लेखनीय योगदानाबद्दल ‘पद्मश्री’ पुरस्कार जाहीर झाल्याबद्दल पालकमंत्र्यांनी त्यांचे विशेष अभिनंदन केले. या पुरस्कारामुळे जिल्ह्याच्या शिरपेचात मानाचा तुरा रोवला गेल्याचे त्यांनी सांगितले.कार्यक्रमात विविध शाळांतील सुमारे दोन हजार विद्यार्थ्यांनी शिस्तबद्ध सामूहिक कवायत सादर केली. तसेच पोलीस दलातील टायसन आणि सिंबा या श्वानांनी सादर केलेली धाडसी प्रात्यक्षिके उपस्थितांच्या आकर्षणाचे केंद्र ठरली. पोलीस दल, गृहरक्षक दल आणि विविध विभागांच्या चित्ररथांनी संचलनात सहभाग नोंदवला. पालकमंत्र्यांनी यावेळी उपस्थित स्वातंत्र्यसैनिकांची भेट घेऊन त्यांना शुभेच्छा दिल्या.
