कवडधनमध्ये भाविकांची मोठी उपस्थिती
सेलू, जि.परभणी : जिल्ह्यातील सेलू तालुक्यातील कवडधन येथील श्री हनुमान मंदिर परिसरात आयोजित करण्यात आलेल्या अखंड हरिनाम सप्ताह आणि बापूसाहेब महाराज खवणे यांच्या शिवमहापुराण कथेची अत्यंत उत्साहात आणि मंगलमय वातावरणात सांगता मंगळवारी, १७ फेब्रुवारी रोजी झाली.
समस्त कवडधन ग्रामस्थांच्या वतीने आयोजित या सोहळ्यात परिसरातील हजारो भाविकांनी श्रवणाचा व महाप्रसादाचा लाभ घेतला. कथाकार बापूसाहेब महाराज खवणे यांनी आपल्या ओघवत्या वाणीतून शिवपुराण कथेचे निरूपण केले. ज्ञानाई खवणे, गणेश महाराज बाजड यांनी गायन तर श्रीराम महाराज शिंदे, सतीश महाराज ताठे यांनी वादनासाठी साथसंगत केली. १० फेब्रुवारीपासून आयोजित या सप्ताहादरम्यान दररोज पहाटे काकडा भजन, ज्ञानेश्वरी पारायण, दुपारी शिवपुराण कथा, सायंकाळी हरिपाठ आणि रात्री ८ वाजता लहुजी महाराज गायकवाड, प्रकाश महाराज शेलवाडीकर, मारोती महाराज वाघ, श्रीरंग महाराज वाहेगांवकर, भागवताचार्य जयराम महाराज तांगडे, राजेभाऊ महाराज घांडगे आणि पंढरीनाथ महाराज मानमोडीकर आदींनी कीर्तनातून समाजप्रबोधन केले.मंगळवारी बापूसाहेब महाराज खवणे यांच्या काल्याच्या कीर्तनाने सांगता झाली. महाप्रसादाचे यजमान सेलू नगरपालिकेचे स्वीकृत सदस्य तथा माजी जिप सभापती अशोक काकडे, संजय साडेगावकर, आशीष डख आदींसह मान्यवरांची उपस्थिती होती. कीर्तनानंतर भाविकांना महाप्रसादाचे वाटप करण्यात आले. विविध कार्यक्रमांच्या यशस्वीतेसाठी कवडधन ग्रामस्थांनी पुढाकार घेतला.
