भीषण अपघातात दुचाकीस्वाराचा जागीच मृत्यू, सेलू-वालूर फाट्याजवळील घटना
सेलू जि.परभणी : सेलू ते परभणी महामार्गावरील वालूर जोड रस्त्यावर शनिवारी, २१ फेब्रुवारी रोजी सकाळी ११ वाजेच्या सुमारास एक भीषण अपघात घडला. या अपघातात एका दुचाकीस्वाराचा जागीच मृत्यू झाला असून त्याचा सहप्रवासी गंभीर जखमी झाला आहे.
मिळालेल्या माहितीनुसार, रखमाजी नामदेव थोरात (वय ५५ वर्ष, रा. डुघरा) हे आपल्या दुचाकीने (एम.एच. २२ ए.एन. ९७५५) जात असताना हायवा ट्रकने (एम.एच. ०९ बी.एन. ८४३३) त्यांच्या दुचाकीला पाठीमागून जोरदार धडक दिली. ही धडक इतकी भीषण होती की, रखमाजी थोरात हे ट्रकच्या मागील चाकाखाली आले आणि त्यांचा जागीच मृत्यू झाला. या अपघातात दुचाकीवर असलेले सहप्रवासी बबन कचरू सिरसाट (वय ४९ वर्ष, रा. कुपटा) हे देखील गंभीर जखमी झाले आहेत. घटनेची माहिती मिळताच स्थानिक नागरिकांनी घटनास्थळी मोठी गर्दी केली होती. सेलू पोलिसांनी तातडीने घटनास्थळी धाव घेतली. जखमी बबन सिरसाट यांना उपचारासाठी सेलू येथील उपजिल्हा रुग्णालयात दाखल केले आहे. सध्या त्यांच्यावर रुग्णालयात उपचार सुरू आहेत. अपघातग्रस्त दोन्ही वाहने पुढील तपासासाठी सेलू पोलीस ठाण्यात जमा करण्यात आली असून, पुढील कारवाई सुरू असल्याची माहिती पोलीस निरीक्षक दीपक बोरसे यांनी दिली.
वालूर रस्ता बनतोय मृत्यूचा सापळा
सेलू ते वालूर रस्ता चांगला झाल्यापासून वाहने भरधाव धावत आहेत. यामध्ये गौण खनिजाचे ट्रॅक्टर, हायवा, तसेच क्षमतेपेक्षा अधिक ऊस वाहतूक करणारे ट्रॅक्टर आणि दुचाकी, चारचाकी वाहनांचा समावेश होतो. थोडीशी चूक अपघातास कारणीभूत ठरून नाहक बळी जाऊन संसार उघड्यावर येत आहेत. दिवसेंदिवस अपघाताच्या घटना वाढत चालल्याने हा रस्ता मृत्यूचा सापळा बनला आहे. वाहन चालकांनी खबरदारी घेण्याची आणि सावध वाहने चालविण्याची नितांत गरज निर्माण झाली आहे.
