सेलूतील गांधी प्राकृतिक चिकित्सा आणि योग मंडळाची २० वर्षांची परंपरा, गीत संगीताच्या कार्यक्रमालाही प्रतिसाद
सेलू जि.परभणी : परभणी जिल्ह्यातील सेलू येथे गांधी प्राकृतिक चिकित्सा एवं योग मंडळ व श्रीरामजी भांगडिया रुग्णसेवा मंडळ यांच्या वतीने होळीनिमित्त मंगळवारी, ३ मार्च २०२६ रोजी आयोजित पारंपरिक मातीस्नानाने धुलीवंदन उत्साहात साजरे करण्यात आले.
उपक्रमाचे हे विसावे वर्ष होते. सेलू येथील चंद्रप्रकाश सांगतांनी व गंगाधर शेरे पाटील यांच्या शेतात धुलिवंदनानिमित्त मातीस्नानाचा उपक्रम सुरू झाला. मागील तीन वर्षांपासून मंठा रोडवरील मालाणी यांच्या शेतातील हॉटेल परिवार फार्म व ॲग्रो टुरिझम परिसरात संयोजक शिवनारायण मालाणी यांच्या मार्गदर्शनाखाली मातीस्नानाचे आयोजन करण्यात येत आहे. या वर्षी मातीस्नानानंतर कडधान्यमिश्रित उसळ, आर्युवेदिक काढा घेण्याची परंपरा जपण्यात आली. शिवनारायण मालाणी, हितेश शहा, रेवा कुंदनानी, प्रवीण माणकेश्वर, आनंद बाहेती, वल्लभ राठी, सतीश जाधव, रोहित काला, भास्करराव घोडके, कैलासराव काळे, श्रीपाद रोडगे, डॉ.विलास मोरे, गंगाधर कान्हेकर, सुनील गायकवाड, बाबासाहेब हेलसकर, कृष्णा काटे, वाल्मिक घाडगे (परतूर), डिगांबर डोंबे, राम सुरवसे, रामकिशन कटारे, सुभाष मोहकरे, प्रेमगोपाल कासट (मंठा) आदींसह अनेकांनी तसेच आरोही ढवळे, स्वराज जाधव, राघव व श्लोक काटे या चिमुकल्यांसह अनेकांनी उत्साहाने माती स्नानाचा आनंद घेतला. यानिमित्ताने आयोजित गीत संगीताच्या कार्यक्रमात कृष्णा काटे, डॉ.विलास मोरे, गंगाधर कान्हेकर, वाल्मिक घाडगे यांनी बहारदार गीते सादर करून उपस्थितांची मने जिंकली. गणेश सिंग, विष्णू, करण सिंग, यश आचलिया आदी उपस्थित होते.
मृदास्नानाला आयुर्वेदात अतिशय महत्त्व आहे. तीळ तेलाने मालिश केल्यानंतर मातीचा लेप शरीरावर लावण्यात येतो. तासभर उन्हात बसून सुकवला जातो. त्यानंतर सचैलस्नान केले जाते. ऋतुचक्राप्रमाणे शरीराला मातीस्नान उपकारक ठरणार आहे, अशी माहिती संयोजक शिवनारायण मालाणी यांनी या वेळी दिली.
