२०० पेक्षा अधिक प्रयोगांचे सादरीकरण; नर्सरी ते अकरावीच्या विद्यार्थ्यांचा उत्स्फूर्त सहभाग
परभणी : धर्मापुरी पाटी येथील ज्ञानसाधना प्रतिष्ठानमध्ये २८ फेब्रुवारी २०२६ रोजी राष्ट्रीय विज्ञान दिनाचे औचित्य साधून भव्य विज्ञान प्रदर्शनाचे आयोजन करण्यात आले होते. या प्रदर्शनात प्रतिष्ठानच्या विविध विभागांतील विद्यार्थ्यांनी विज्ञान विषयावर आधारित २०० पेक्षा अधिक प्रयोगांची आणि मॉडेल्सची मांडणी केली होती.
कार्यक्रमाचे उद्घाटन संस्थेचे अध्यक्ष किरण सोनटक्के आणि सचिव शितल सोनटक्के यांच्या हस्ते रिबीन कापून करण्यात आले. या प्रदर्शनामध्ये नर्सरीपासून ते अकरावीपर्यंतच्या विद्यार्थ्यांनी सहभाग नोंदविला. यामध्ये प्रामुख्याने पर्यावरण व शाश्वत विकास, वाहतूक व दळणवळण, कृत्रिम बुद्धिमत्ता (AI), सुरक्षित विद्युत उपकरणे, आपत्ती व्यवस्थापन, रोबोटिक्स, जैवतंत्रज्ञान आणि नूतनीकरणक्षम ऊर्जा साधने अशा आधुनिक विषयांवर विद्यार्थ्यांनी आपले प्रयोग सादर केले.
विज्ञानाच्या या सर्व प्रयोगांचे निरीक्षण आणि मूल्यमापन तज्ज्ञ शिक्षकांमार्फत करण्यात आले. सायंकाळच्या सत्रात बक्षीस वितरण आणि समारोपीय कार्यक्रम पार पडला. यावेळी शितल सोनटक्के यांनी प्रास्ताविकातून दैनंदिन जीवनातील विज्ञानाचे महत्त्व विशद केले. प्रदर्शनात सहभागी पहिली ते अकरावीच्या विद्यार्थ्यांचे ५ गट करण्यात आले होते. प्रत्येक गटातून प्रथम, द्वितीय, तृतीय व उत्तेजनार्थ क्रमांक काढण्यात आले. यशस्वी विद्यार्थ्यांना ट्रॉफी, प्रमाणपत्र आणि भेटवस्तू देऊन गौरविण्यात आले.
अध्यक्षीय भाषणात किरण सोनटक्के यांनी विद्यार्थ्यांना विज्ञानाची विविध उदाहरणे देऊन वैज्ञानिक दृष्टिकोनाची महती सांगितली. या सोहळ्याला प्रतिष्ठानच्या सर्व विभागांचे समन्वयक, विभाग प्रमुख, विज्ञान व गणित शिक्षक तसेच इतर कर्मचारी उपस्थित होते. कार्यक्रमाचे सूत्रसंचालन धनश्री चव्हाण यांनी केले, तर व्ही. बी. पवार यांनी उपस्थितांचे आभार मानले.
