सेलू शहरातील धक्कादायक घटना : गोवंश कत्तलीच्या कारवाईदरम्यान दगडफेक; पाच आरोपी ताब्यात
सेलू जि.परभणी : सेलू शहरातील रहेमान नगर भागातील नाल्यावरील एका पत्राच्या शेडमध्ये सुरू असलेल्या गोवंश कत्तलीवर धाड टाकण्यासाठी गेलेल्या पोलीस पथकावर जमावाने दगडफेक केल्याची धक्कादायक घटना घडली आहे. याप्रकरणी पोलिसांनी पाच जणांना ताब्यात घेतले असून १५ ते २० अनोळखी व्यक्तींविरुद्ध गुन्हा दाखल करण्यात आला आहे.
मिळालेल्या माहितीनुसार, रविवार, २९ मार्च रोजी रोजी सकाळी ८.१५ वाजेच्या सुमारास सेलू पोलीस ठाण्याचे सहाय्यक पोलीस निरीक्षक कृष्णा भागीनाथ घायवट आणि त्यांचे पथक रहेमान नगर भागात कारवाईसाठी गेले होते. यावेळी आरोपी रज्जाक जैरुद्दीन कुरेशी, मालजी चांद साहब कुरेशी, तला मालजी कुरेशी, मोबीन ऊर्फ गठुळा मुसा कुरेशी, जावेद नड्डू कुरेशी, सादिक रजाक कुरेशी आणि इतर १५ ते २० जणांच्या जमावाने दगडफेक करून पोलिसांना कारवाई करण्यापासून रोखले.
दगडफेक करून पुरावे पळवले
पोलिस कर्मचारी गोवंश कत्तलीच्या ठिकाणाहून अंदाजे १०० किलो मांस, कातडी, गोवंशाचे अवशेष आणि कत्तलीसाठी वापरले जाणारे सुऱ्या, कुऱ्हाडी, तराजू, वजन मापे यांसारखे साहित्य जप्त करत होते. मात्र, जमावाने पोलिसांवर दगडफेक करत हे सर्व साहित्य आणि पुरावे बळजबरीने पळवून नेले. या कृत्यामुळे शासकीय कामात अडथळा निर्माण झाल्याने परिसरात दहशतीचे वातावरण पसरले. दरम्यान, या घटनेत कोणालाही इजा झाली नाही, असे श्री.घायवट यांनी सांगितले.
या घटनेप्रकरणी सहाय्यक पोलीस निरीक्षक कृष्णा घायवट यांनी दिलेल्या फिर्यादीवरून सेलू पोलीस ठाण्यात भारतीय न्याय संहिता आणि महाराष्ट्र प्राणी संरक्षण अधिनियमाच्या विविध कलमान्वये गुन्हा दाखल करण्यात आला आहे. पोलीस निरीक्षक दीपक बोरसे यांच्या मार्गदर्शनाखाली सध्या पाच आरोपींना ताब्यात घेण्यात आले आहे. या प्रकरणाचा पुढील तपास पोलीस उपनिरीक्षक शाकीर शेख करत आहेत.
