प्रशासनाचा महत्त्वपूर्ण निर्णय, खरीप हंगामाच्या पार्श्वभूमीवर मशागतीच्या कामांना गती; अटी व शर्तींचे पालन करणे बंधनकारक
परभणी : खरीप हंगामाच्या पार्श्वभूमीवर मे व जून महिन्यात शेती मशागतीची कामे मोठ्या प्रमाणात सुरू होतात. या काळात शेतकऱ्यांना ट्रॅक्टरसाठी डिझेल मिळण्यात अडचणी येऊ नयेत, यासाठी प्रशासनाने महत्त्वपूर्ण निर्णय घेतला आहे. शेतीच्या मशागतीसाठी वापरल्या जाणाऱ्या ट्रॅक्टरसाठी एकावेळी गरजेनुसार जास्तीत जास्त १०० लिटरपर्यंत डिझेल पेट्रोल पंपावरून घेऊन जाण्यास अटी व शर्तींसह परवानगी देण्यात आली आहे.
पेट्रोलियम अधिनियम १९३४ आणि पेट्रोलियम नियम २००२ मधील तरतुदींनुसार हा निर्णय घेण्यात आला आहे. प्रशासनाने जारी केलेल्या आदेशानुसार, शेती कामाची गरज लक्षात घेऊन हे इंधन दिले जाईल. मात्र, हे डिझेल फक्त मान्यताप्राप्त धातूच्या किंवा जाड प्लास्टिकच्या ‘एप्रुव्हड कंटेनर’मध्येच वाहून नेता येईल. प्लास्टिकच्या बाटल्यांमध्ये डिझेल देण्यास पूर्णतः बंदी घालण्यात आली आहे.
या अटींचे करावे लागेल पालन: डिझेल साठवणुकीसाठी स्टील किंवा लोखंडी कंटेनरचा वापर करणे बंधनकारक असून त्यात किमान ५ टक्के रिकामी जागा ठेवणे आवश्यक आहे. साठवणुकीची जागा हवेशीर असावी आणि ज्वलनशील पदार्थांपासून दूर असावी. तसेच संबंधित ठिकाणी ‘धूम्रपान निषेध’ व ‘आगीपासून सावध’ असे फलक लावणे आवश्यक आहे.
आवश्यक कागदपत्रे: पेट्रोल पंपावरून डिझेल घेताना शेतकऱ्यांना खालील कागदपत्रे सादर करावी लागतील:
- [Aadhaar Redacted]
- ॲग्री स्टॅक क्रमांक
- ७/१२ उतारा व नमुना ८-अ
- ट्रॅक्टरचे आरसी बुक
पेट्रोल पंप चालकांनी एकदा डिझेल दिल्यानंतर पुढील पुरवठा किमान १५ दिवसांच्या अंतराने करावा. अशा विक्रीची स्वतंत्र नोंद नाव, मोबाईल क्रमांक व कारणासह ठेवणे तसेच सीसीटीव्ही फुटेज जतन करणे बंधनकारक आहे. नियमांचे उल्लंघन झाल्यास जीवनावश्यक वस्तू अधिनियम १९५५ अंतर्गत कारवाई केली जाईल, असा इशारा जिल्हा पुरवठा अधिकारी विलास मुसळे यांनी दिला आहे. हा आदेश पुढील आदेशापर्यंत लागू राहील.
