श्रीसोनामाय प्रतिष्ठानच्या वतीने १३ ते १९ जूनपर्यंत आयोजन, धाराशिवचे श्रीपद्मनाभ महाराज व्यास करणार कथा निरूपण
सेलू : येथील श्रीसोनामाय प्रतिष्ठानच्या वतीने पुरुषोत्तम मासानिमित्त महेशनगर, सेलू (जि. परभणी) येथील ‘भक्तीतीर्थ’ श्रीसाई मंदिरात श्रीमद्भागवत कथा ज्ञानयज्ञाचे भव्य आयोजन करण्यात आले आहे. हा सोहळा शनिवार,१३ जून ते शुक्रवार, १९ जून २०२६ या कालावधीत पार पडणार आहे.
श्रीमद्भागवत हे भगवंताचे प्रत्यक्ष वाङ्मयमूर्ती स्वरूप मानले जाते. त्यामुळे या पवित्र पुरुषोत्तम मासात भागवत कथेच्या श्रवणाचा लाभ भाविकांना मिळावा या उद्देशाने हे आयोजन केले आहे. या महोत्सवात कथा प्रवक्ता म्हणून वेदमूर्ती शास्त्रसंपन्न संत हभप श्रीपद्मनाभ महाराज व्यास (धाराशिव) हे आपल्या रसाळ वाणीतून कथेचे निरूपण करणार आहेत. कथेची वेळ दररोज दुपारी ३ ते ६ अशी असेल. या ज्ञानयज्ञाची सांगता शुक्रवार, १९ जून २०२६ रोजी सकाळी ९ ते १२ या वेळेत कथासमाप्तीने होईल. १९ जूनरोजी सकाळी ७.३० वाजता भव्य ग्रंथदिंडीचे आयोजन करण्यात आले आहे. ही दिंडी श्री केशवराज बाबासाहेब मंदिर ते कथास्थळ अशी काढण्यात येईल. कथासमाप्तीनंतर दुपारी ४.३० वाजेपर्यंत महाप्रसादाचे वाटप केले जाईल. या भक्तीमय वातावरणात सर्व भाविकांनी उपस्थित राहून श्रवणानंदाचा व महाप्रसादाचा लाभ घ्यावा, असे आवाहन श्रीमती वसुधा मनोहरराव कुलकर्णी, मीना व शशिकांत सोनाजीपंत कुलकर्णी, सुनंदा व शरद सोनाजीपंत कुलकर्णी, वैशाली व राहुल शशिकांत कुलकर्णी, दीप्ती व अतुल शरदराव कुलकर्णी तसेच इशिता, शाश्वत व कुलकर्णी परिवाराने केले आहे.
“श्रीमद्भागवत हे भगवंताचे प्रत्यक्ष वाङ्मय स्वरूप आहे. कलियुगात भगवंताच्या या कथेचे श्रवण करणे हेच सर्वश्रेष्ठ मानले गेले आहे. सेलू आणि परिसरातील समस्त भाविकांनी लाभ घेऊन आपले जीवन धन्य करावे.” – प्राचार्य डॉ.शरद कुलकर्णी आणि परिवार, सेलू (आयोजक)
