सेलू येथे यशस्वी आयोजन: मोतीबिंदू रुग्णांवर होणार शस्त्रक्रिया
सेलू : येथील लॉयन्स क्लबच्या वतीने मोफत नेत्र तपासणी शिबिराचे आयोजन करण्यात आले होते. शहरातील चिरायू रुग्णालयात ७ जून रोजी पार पडलेल्या या शिबिरात परिसरातील ८५ रुग्णांची नेत्रतपासणी करण्यात आली. या उपक्रमातून मोतीबिंदू आढळलेल्या रुग्णांना पुढील उपचारांसाठी टप्प्याटप्प्याने परतूर येथील दृष्टी लॉयन्स नेत्रालयात शस्त्रक्रियेसाठी पाठवले जाणार असल्याची माहिती तालुकाध्यक्ष सुयश पटवारी यांनी दिली.
या शिबिरामध्ये नेत्र तपासणीसाठी परमेश्वर वानखेडे यांनी सहकार्य केले. शिबिराच्या यशस्वीतेसाठी लॉयन्स क्लबच्या सर्व सदस्यांनी अथक परिश्रम घेतले. या वेळी उपस्थित तालुका सचिव डॉ. बाळासाहेब जाधव, उपाध्यक्ष अजित सराफ, कोषाध्यक्ष डॉ. शैलेश मालाणी, डॉ. कुंदन राऊत, दत्तात्रय उर्फ अप्पूसेठ सोळंके, सहसचिव डॉ. अनुराग जोगदंड, राजेंद्र सराफ, डॉ. आशिष मेहता, डॉ. उमेश गायकवाड, डॉ. कैलास आवटे, अनुप गुप्ता, डॉ. सुदर्शन मालाणी, डॉ. परेश बिनायके, सागर लोया, सुभाष मोहकरे आणि खुशाल तांगडे यांनी कार्यक्रमाचे संयोजन केले.
