महाराष्ट्र राज्य नगराध्यक्ष महासंघाच्या बैठकीत नियुक्ती
सेलू जि.परभणी : सेलूचे नगराध्यक्ष मिलिंद सावंत यांची महाराष्ट्र राज्य नगराध्यक्ष महासंघाच्या राज्य सरचिटणीसपदी निवड झाली आहे. महासंघाच्या नुकत्याच मुंबई येथे पार पडलेल्या महत्वपूर्ण बैठकीत ही निवड करण्यात आली आहे.मिलिंद सावंत यांच्यावर छत्रपती संभाजीनगर (मराठवाडा विभाग) व उत्तर महाराष्ट्र विभागाची जबाबदारी सोपविण्यात आली आहे.
श्री.सावंत यांच्या सामाजिक, सांस्कृतिक, राजकीय आणि स्थानिक स्वराज्य संस्था स्तरावर केलेल्या महत्त्वपूर्ण कार्याची दखल घेऊन त्यांची निवड करण्यात आली आहे. या बैठकीस महासंघाचे राज्य कार्याध्यक्ष रणजित चव्हाण, अध्यक्ष रूचिता राजेंद्र घोरपडे, संयोजक लक्ष्मणराव लटके यांच्यासह राज्यभरातून जवळपास शंभरावर नगराध्यक्ष उपस्थित होते. श्री.सावंत यांच्या या निवडीबद्दल राज्यमंत्री तथा परभणी जिल्ह्याच्या पालकमंत्री मेघना साकोरे-बोर्डीकर, माजी आमदार रामप्रसाद बोर्डीकर, माजी नगराध्यक्ष विनोद बोराडे, पाथरीचे नगराध्यक्ष आसेफ खान, सोनपेठचे नगराध्यक्ष परमेश्वर कदम, जिंतूरचे प्रताप देशमुख, तसेच डॉ. अंकुश लाड यांच्यासह विविध स्तरांतून अभिनंदन होत आहे.
