गटविकास अधिकारी उदय जाधव यांची माहिती, मासिक सभेतील चर्चेनंतर निर्णय
सेलू /परभणी : पंचायत समिती सेलूच्या मासिक सभेत खत विक्री केंद्रांवरील शेतकऱ्यांच्या तक्रारी, एमआरपीपेक्षा अधिक दराने खत विक्री तसेच लिंकिंगसारख्या प्रकारांबाबत सदस्यांनी उपस्थित केलेल्या मुद्द्यांवर सविस्तर चर्चा झाल्यानंतर प्रशासनाने तत्काळ पावले उचलली आहेत. त्यानुसार खरीप हंगाम २०२६-२७ दरम्यान कृषी निविष्ठा विक्री केंद्रांवर देखरेख ठेवण्यासाठी जिल्हा परिषद गटनिहाय तसेच सेलू शहरासाठी स्वतंत्र विशेष पथके नियुक्त करण्यात आली आहेत. गटविकास अधिकारी उदय जाधव यांनी ही माहिती दिली.
यावर्षी विविध खतांच्या दरांमध्ये वाढ झाल्याच्या पार्श्वभूमीवर काही विक्री केंद्रांमध्ये नमूद कमाल किरकोळ किंमतीपेक्षा (एमआरपी) अधिक दराने विक्री तसेच इतर वस्तूंची सक्तीची विक्री (लिंकिंग) होत असल्याच्या तक्रारी प्रशासनाकडे प्राप्त झाल्या होत्या. या अनुषंगाने पंचायत समिती प्रशासनाने विशेष देखरेख यंत्रणा कार्यान्वित केली आहे.दरम्यान, एमआरपीपेक्षा अधिक दराने खत विक्री झाल्याच्या तक्रारींची दखल घेत तीन खत विक्री केंद्रांना कारणे दाखवा नोटिसा बजावण्यात आल्या असून संबंधितांना तीन दिवसांच्या आत स्पष्टीकरण सादर करण्याचे निर्देश देण्यात आले आहेत. समाधानकारक खुलासा प्राप्त न झाल्यास कायदेशीर तरतुदीनुसार पुढील कारवाई करण्यात येणार असल्याचा इशारा प्रशासनाने दिला आहे.शेतकऱ्यांना योग्य दराची माहिती उपलब्ध व्हावी यासाठी प्रत्येक कृषी निविष्ठा विक्री केंद्राच्या दर्शनी भागावर खतांच्या कमाल किरकोळ किंमतीचे (एमआरपी) माहितीपत्रक लावण्याच्या सूचना देण्यात आल्या आहेत.
तसेच शेतकऱ्यांनी प्रत्यक्ष खताच्या पिशवीवरील किंमत तपासूनच खरेदी करावी आणि जास्त दराने विक्री अथवा लिंकिंगसारखे प्रकार आढळल्यास संबंधित अधिकाऱ्यांकडे तक्रार नोंदवावी, असे आवाहन करण्यात आले आहे.याचबरोबर ग्रामपंचायत स्तरावरील सरपंच, ग्रामविकास अधिकारी व कर्मचाऱ्यांना प्राप्त तक्रारींची वस्तुस्थिती तपासून ती गुणवत्ता नियंत्रण निरीक्षकांकडे तात्काळ कळविण्याच्या सूचना देण्यात आल्या आहेत. शेतकऱ्यांच्या हितसंरक्षणासाठी प्रशासनाकडून आवश्यक त्या सर्व उपाययोजना राबविल्या जात असल्याचे गटविकास अधिकारी यांनी स्पष्ट केले.
