भव्य ग्रंथ दिंडी, कथा समाप्तीनंतर महाप्रसादाचा लाभ घेण्याचे कुलकर्णी परिवाराचे आवाहन
सेलू, दि.१८ : येथील श्रीसोनामाय प्रतिष्ठानच्या वतीने पुरुषोत्तम मासानिमित्त महेशनगरमधील ‘भक्तीतीर्थ’ श्रीसाई मंदिरात आयोजित करण्यात आलेल्या श्रीमद्भागवत कथा ज्ञानयज्ञाची सांगता आज, शुक्रवार दि. १९ जून २०२६ रोजी होत आहे. पवित्र पुरुषोत्तम मासात भाविकांना भागवत कथेच्या श्रवणाचा लाभ मिळावा, या उद्देशाने शनिवार दि. १३ जूनपासून या सोहळ्याचे भव्य आयोजन करण्यात आले होते.
या महोत्सवात कथा प्रवक्ता म्हणून वेदमूर्ती शास्त्रसंपन्न संत हभप श्रीपद्मनाभ महाराज व्यास (धाराशिव) हे दररोज दुपारी ३ ते ६ या वेळेत आपल्या रसाळ वाणीतून कथेचे निरूपण करत असून, परिसरातील भाविक या श्रवणानंदाचा मोठ्या संख्येने लाभ घेत आहेत.या ज्ञानयज्ञाच्या सांगता समारंभाचे नियोजन अत्यंत भक्तीमय वातावरणात करण्यात आले आहे. आज सकाळी ७.३० वाजता श्री केशवराज बाबासाहेब मंदिर ते कथास्थळ अशी भव्य ग्रंथदिंडी काढण्यात येणार आहे. त्यानंतर सकाळी ९ ते १२ या वेळेत मुख्य कथासमाप्तीचा सोहळा पार पडेल. श्रीमद्भागवत हे भगवंताचे प्रत्यक्ष वाङ्मयमूर्ती स्वरूप मानले जात असल्याने, या ज्ञानयज्ञाच्या सांगता प्रसंगी पंचक्रोशीतील भाविकांची मोठी उपस्थिती लाभण्याची शक्यता आहे.
कथासमाप्तीनंतर दुपारी ४.३० वाजेपर्यंत महाप्रसादाच्या वाटपाचे आयोजन करण्यात आले आहे. या संपूर्ण धार्मिक महोत्सवाचा आणि महाप्रसादाचा सर्व भाविकांनी उत्स्फूर्तपणे लाभ घ्यावा, असे आवाहन श्रीमती वसुधा मनोहरराव कुलकर्णी, मीना व शशिकांत सोनाजीपंत कुलकर्णी, सुनंदा व शरद सोनाजीपंत कुलकर्णी, वैशाली व राहुल शशिकांत कुलकर्णी, दीप्ती व अतुल शरदराव कुलकर्णी तसेच इशिता, शाश्वत व समस्त कुलकर्णी परिवाराच्या वतीने करण्यात आले आहे.
