जाधव यांच्या बंडखोरीवरून गंगाखेड, पाथरी, सोनपेठमध्ये शिवसैनिक आक्रमक
परभणी : खासदार संजय जाधव यांच्या बंडखोरीचे परभणी जिल्ह्यात तीव्र पडसाद उमटले आहेत. जाधवांच्या बंडखोरीच्या निषेधार्थ सोनपेठपाठोपाठ गंगाखेड आणि पाथरी शहरात शिवसेना उबाठा पक्षाच्या वतीने शुक्रवारी, १९ जून २०२६ रोजी तीव्र आंदोलन करण्यात आले.
गंगाखेड येथे जिल्हाप्रमुख विष्णू मुरकुटे यांच्या नेतृत्वात खासदार संजय जाधव यांच्या प्रतिकात्मक पुतळ्याचे दहन करण्यात आले. यावेळी आंदोलनकर्त्यांनी जोरदार घोषणाबाजी करत खासदार संजय जाधव यांनी सर्वप्रथम खासदारकीचा राजीनामा द्यावा, अशी मागणी केली. जनतेच्या मतांवर निवडून येऊन पक्षाशी बेईमानी करणाऱ्यांना शिवसैनिक कधीही माफ करणार नाहीत, अशा भावना उपस्थित शिवसैनिकांनी व्यक्त केल्या.या आंदोलनात उपजिल्हाप्रमुख माधव शेंडगे, उपजिल्हाप्रमुख साहेबराव कल्याणकर, बाळासाहेब लोखंडे, शिक्षक सेनेचे जिल्हाप्रमुख बाळासाहेब राखे, माधवराव देसाई, तालुकाप्रमुख जानकीराम पवार, बापूराव पोळ यांच्यासह मोठ्या संख्येने शिवसैनिक उपस्थित होते. आंदोलनामुळे काही काळ परिसरात राजकीय वातावरण तापले होतेे.
पाथरी शहरात निषेध मोर्चा : शिवसेना उद्धव बाळासाहेब ठाकरे पक्षाच्या कार्यकर्त्यांनी शुक्रवारी पाथरी तहसील कार्यालयासमोर खासदार संजय जाधव यांच्या भूमिकेविरोधात प्रतीकात्मक निषेध आंदोलन केले. शहरातून निषेध मोर्चा व प्रतिकात्मक अंत्ययात्रा काढत तहसील कार्यालयासमोर जाधव यांच्या प्रतिमेला जोडे मारून त्याचे दहन केले. “गद्दारी खपवून घेणार नाही” अशा घोषणा देण्यात आल्या. या आंदोलनात जिल्हाप्रमुख रविंद्र धर्मे यांच्यासह कल्याणराव रेंगे, मुंजाभाऊ कोल्हे, हरिभाऊ वाकणकर, आत्माराम वाघ, रंजित गिराम, रावसाहेब निकम, तुकाराम हरकळ, सत्यनारायण घाटुळ, माऊली गलबे आदी पदाधिकारी उपस्थित होते. दरम्यान, जिल्हाप्रमुख रविंद्र धर्मे यांनी प्रसारमाध्यमांशी बोलताना सांगितले की, “बाळासाहेबांची विचारधारा सोडून सत्तेच्या जवळ जाणाऱ्या निर्णयांचा आम्ही निषेध करत आहोत. जनतेचा विश्वासघात करणाऱ्या लोकप्रतिनिधींना लोकशाही मार्गाने जाब विचारला जाईल.”
सोनपेठमध्ये प्रतिकात्मक अंत्ययात्रा : खासदार संजय जाधव यांच्या बंडखोरीनंतर सोनपेठमध्ये निष्ठावान शिवसैनिकांनी आक्रमक होत जाधवांच्या प्रतिमेला तीव्र जोडे मारून निषेध केला. शिवसेना उद्धव ठाकरे गटाच्या कार्यालयाबाहेर गुरुवारी, १८ जून रोजी शिवसैनिक प्रचंड संतापलेले पाहायला मिळाले. संतप्त कार्यकर्त्यांनी जाधव यांच्या छायाचित्राला चपलांचा हार घातला आणि तिथूनच त्यांची प्रतीकात्मक अंत्ययात्रा काढली. ‘गद्दार संजय जाधव’ अशा घोषणा देत कार्यकर्त्यांनी हा मोर्चा शहराच्या मुख्य भागात आणला. छत्रपती शिवाजी महाराज चौकात जाधव यांच्या प्रतिमेचे जाहीर दहन करण्यात आले. आंदोलनात विधानसभा प्रमुख कल्याणराव रेंगे उपजिल्हाप्रमुख कृष्णा पिंगळे, संतोष गवळी, अमोल दहीवाळ, श्रीकृष्ण साठे आदींसह शिवसैनिक मोठ्या संख्येने उपस्थित होते.
