परभणी : भारत निवडणूक आयोगाच्या निर्देशानुसार ९६-परभणी विधानसभा मतदारसंघातील विशेष संक्षिप्त पुनरीक्षण कार्यक्रम प्रभावीपणे राबविण्यासाठी जिल्हाधिकारी कार्यालयातील नियोजन सभागृहात संबंधित अधिकारी व कर्मचाऱ्यांचे प्रशिक्षण आयोजित करण्यात आले. यासोबतच एका बॅचचे प्रशिक्षण व्हिडिओ कॉन्फरन्सिंगद्वारे ऑनलाइन पद्धतीनेही पार पडले.
प्रशिक्षणास उपविभागीय अधिकारी उदयसिंह भोसले, तहसीलदार डॉ. संदीप राजपुरे, निवडणूक नायब तहसीलदार सुनील कांबळे, सहायक मतदार नोंदणी अधिकारी, बीएलओ सुपरवायझर, नोडल अधिकारी तसेच संबंधित अधिकारी व कर्मचारी उपस्थित होते. यावेळी मतदार यादी अद्ययावत करण्याची कार्यपद्धती, घरभेटींचे नियोजन, आवश्यक कागदपत्रांची पडताळणी, ऑनलाइन प्रणालीचा प्रभावी वापर तसेच भारत निवडणूक आयोगाने निश्चित केलेल्या वेळापत्रकानुसार कामकाज पूर्ण करण्याबाबत सविस्तर मार्गदर्शन करण्यात आले.
उपविभागीय अधिकारी उदयसिंह भोसले यांनी सर्व अधिकारी व कर्मचाऱ्यांना आयोगाच्या निर्देशांचे काटेकोर पालन करून पुनरीक्षणाचे काम अचूक, पारदर्शक आणि वेळेत पूर्ण करण्याचे निर्देश दिले. या प्रक्रियेत कोणत्याही प्रकारचा हलगर्जीपणा किंवा निष्काळजीपणा सहन केला जाणार नाही. निर्देशांचे उल्लंघन करणाऱ्यांवर नियमानुसार प्रशासकीय कारवाई करण्यात येईल, असा स्पष्ट इशाराही त्यांनी यावेळी दिला.
