पाथरगव्हाण येथे विविध सामाजिक उपक्रम
पाथरी : संघर्ष योद्धा मनोज जरांगे पाटील यांच्या वाढदिवसाचे औचित्य साधून कासापुरी जि.प. सर्कलमधील सकल मराठा समाजाच्या वतीने पाथरगव्हाण येथे शनिवारी, १ ऑगस्ट रोजी आयोजित रक्तदान शिबीरात ७५ जणांनी रक्तदान केले. यानिमित्ताने विविध सामाजिक उपक्रमांचे आयोजन करण्यात आले.
शिबिराला कासापुरी सर्कलमधील युवक आणि समाज बांधवांनी मोठा प्रतिसाद दिला. यामध्ये एकूण ७५ रक्तदात्यांनी स्वेच्छेने रक्तदान केले.या शिबिराच्या यशस्वी आयोजनासाठी प्राथमिक आरोग्य केंद्र पाथरगव्हाणच्या वैद्यकीय पथकाने मोलाचे सहकार्य केले. यामध्ये डॉ. प्रकाश पवार, डॉ. शुभांगी, विशाल गोरे, मोनाली दडके, आम्रपाली धृतराज, आरोग्य सहाय्यक वानेरे, एकशिंगे, आरोग्य सेवक हारणे, पेदापल्ली, कानशुकले, नंदा मांडे आणि परिचर इब्राहिम खान यांच्यासह आरोग्य विभागातील कर्मचाऱ्यांनी अथक परिश्रम घेतले.शिबिरादरम्यान अनेक मराठा सेवक आणि सकल मराठा समाजाचे पदाधिकारी उपस्थित होते. शिबिर यशस्वी करण्यासाठी समाज बांधवांनी पुढाकार घेऊन नियोजन केले. रक्तदानासोबतच समाजातील इतर सामाजिक उपक्रमांनाही यानिमित्ताने चालना देण्यात आली. आयोजकांनी उपस्थित सर्व रक्तदात्यांचे आणि सहकार्य करणाऱ्यांचे आभार मानले.
