महसूल दिन : गुणवत्तापूर्ण सेवेतून प्रशासनाची प्रतिमा उंचवा : जिल्हाधिकारी संजयसिंह चव्हाण

उत्कृष्ट अधिकारी, कर्मचारी आणि गुणवंत विद्यार्थ्यांचा गौरव

परभणी : परभणी जिल्हाधिकारी कार्यालयात १ ऑगस्ट रोजी महसूल दिन मोठ्या उत्साहात साजरा करण्यात आला. या प्रसंगी महसूल विभागातील उत्कृष्ट अधिकारी व कर्मचारी, निवृत्त कर्मचारी, गुणवंत विद्यार्थी आणि जनगणना, निवडणूक व्यवस्थापन व विशेष सखोल पुनरीक्षण (SIR) कामात उल्लेखनीय कामगिरी करणाऱ्या अधिकाऱ्यांचा सन्मान करण्यात आला. वेळेत व गुणवत्तापूर्ण सेवेतून प्रशासनाची प्रतिमा उंचावण्याचे आवाहन जिल्हाधिकारी संजयसिंह चव्हाण यांनी या वेळी केले.

जिल्हाधिकारी संजयसिंह चव्हाण यांच्या अध्यक्षतेखाली झालेल्या या कार्यक्रमास जिल्हा पोलीस अधीक्षक पंकज कुमावत, महापालिका आयुक्त नितीन नार्वेकर आणि प्रभारी अपर जिल्हाधिकारी शोभा जाधव यांची प्रमुख उपस्थिती होती. निवासी उपजिल्हाधिकारी अनुराधा ढालकरी यांनी प्रास्ताविकात वर्षभरातील कामगिरीचा आढावा घेतला.कार्यक्रमात १ एप्रिल २०२५ ते ३१ जुलै २०२६ या कालावधीत सेवानिवृत्त झालेल्या १७ अधिकारी व कर्मचाऱ्यांचा सत्कार करण्यात आला. तसेच इयत्ता १० वी, १२ वी, शिष्यवृत्ती व तांत्रिक शिक्षण परीक्षांमध्ये विशेष प्राविण्य मिळवणाऱ्या कर्मचाऱ्यांच्या पाल्यांना गौरविण्यात आले. जिल्हा व विभाग स्तरावर पोलीस पाटलांपासून उपजिल्हाधिकाऱ्यांपर्यंतच्या विविध संवर्गातील उत्कृष्ट कर्मचाऱ्यांना पुरस्कार प्रदान करण्यात आले.जनगणना २०२७ च्या प्रथम टप्प्यात परभणी जिल्ह्याने राज्यात ९ वा आणि छत्रपती संभाजीनगर विभागात २ रा क्रमांक मिळवल्याबद्दल अनुराधा ढालकरी, जिवराज डापकर, माधवराव बोथीकर व अलताफ मिया यांचा गौरव करण्यात आला. जिल्हा परिषद व पंचायत समिती निवडणुकीच्या पारदर्शक नियोजनाबद्दल उपजिल्हाधिकारी अनिता भालेराव यांचा सत्कार झाला. तर विशेष सखोल पुनरीक्षण (SIR) कार्यक्रमात जिल्ह्याने राज्यात ३ रा क्रमांक मिळवल्याबद्दल उपविभागीय अधिकारी उदयसिंह भोसले, जिवराज डापकर, शैलेश लाहोटी व संगीता चव्हाण यांना सन्मानित करण्यात आले.कार्यक्रमाचे नियोजन निवासी उपजिल्हाधिकारी अनुराधा ढालकरी यांच्या मार्गदर्शनाखाली नायब तहसीलदार प्रशांत वाकोडकर, सहाय्यक महसूल अधिकारी विठ्ठल मोरे, गजानन अन्नपुरे, विशाल गाजरे, तसेच जगदीश दुधारे, प्रदिप मुनेश्वर, दिनेश काळे आणि अर्जुन कांदे यांनी केले.