सेलूतील नूतन विद्यालयात प्रबोधनपर कार्यक्रम
सेलू : भारत सरकारच्या ‘नशामुक्त भारत अभियान’ आणि ‘मिशन स्पंदन’ अंतर्गत प्रजापिता ब्रह्माकुमारी ईश्वरीय विश्व विद्यालयाच्या वतीने सोमवार, दि. १० ऑगस्ट २०२६ रोजी नूतन विद्यालय, सेलू येथे ‘१० कोटी व्यसनमुक्त भारत संकल्प महाभियान’ उत्साहात संपन्न झाले.
दादी प्रकाशमणिजी यांच्या पावन स्मृतीनिमित्त ब्रह्माकुमारीजच्या मेडिकल विंगच्या पुढाकाराने देशभरातील १० हजारांहून अधिक केंद्रांवर या अभियानाचा प्रारंभ करण्यात आला. याच अभियानाचा एक भाग म्हणून नूतन विद्यालयातील विद्यार्थ्यांना व्यसनमुक्त जीवनशैलीचे महत्त्व पटवून देण्यात आले.
यावेळी सेलू येथील प्रजापिता ब्रह्माकुमारी ईश्वरीय विश्व विद्यालयाच्या ब्रह्माकुमारी राधा दीदी यांनी विद्यार्थ्यांना मार्गदर्शन केले. तंबाखू, गुटखा, दारू तसेच अन्य व्यसनांपासून दूर राहण्याचे आवाहन त्यांनी केले. योग, ध्यान, सकारात्मक विचार आणि निरोगी जीवनशैलीचा अंगीकार करण्याचा संदेश देत विद्यार्थ्यांना व्यसनमुक्त भारताची संकल्प शपथ देण्यात आली.
कार्यक्रमाच्या अध्यक्षस्थानी मुख्याध्यापक के. के. देशपांडे होते. यावेळी रंगनाथ तांबे भाई, उपमुख्याध्यापक डी. बी. घोगरे, एस. डी. बोधनापोड आणि जी. एस. माळवे यांची प्रमुख उपस्थिती होती. व्यसनमुक्त समाजाच्या निर्मितीसाठी विद्यार्थी, पालक, शिक्षक आणि समाजातील प्रत्येक घटकाने सक्रिय सहभाग घेणे आवश्यक असून, नशामुक्त व निरोगी समाज हीच देशाच्या प्रगतीची भक्कम पायाभरणी असल्याचा संदेश यावेळी देण्यात आला. सूत्रसंचालन डॉ. काशिनाथ पल्लेवाड यांनी तर आभार प्रदर्शन बाळू बुधवंत यांनी मानले.
