देशनिष्ठ प्रतिनिधी, वाशिम : मंगरुळपीर शहरातील नागरिकांच्या समस्या आणि विविध प्रश्नांना तत्परतेने प्रतिसाद देण्यासाठी सुरू करण्यात आलेल्या नगराध्यक्ष अशोकभाऊ महादेवराव परळीकर यांच्या जनसंपर्क कार्यालयाचे उद्घाटन शुक्रवार, दि. १४ ऑगस्ट रोजी राज्याचे कॅबिनेट मंत्री तथा वाशिम जिल्ह्याचे पालकमंत्री दत्तामामा भरणे यांच्या शुभहस्ते उत्साहपूर्ण वातावरणात पार पडले.
महात्मा ज्योतिबा फुले चौक येथील सोनाई कॉम्प्लेक्स येथे झालेल्या या कार्यक्रमाला राष्ट्रवादी काँग्रेस पक्षाचे पदाधिकारी, कार्यकर्ते, नागरिक व विविध क्षेत्रातील मान्यवरांची मोठी उपस्थिती होती. उद्घाटनानंतर दत्तामामा भरणे यांनी उपस्थितांना मार्गदर्शन करताना पक्षबांधणी, संघटनात्मक काम आणि जनतेशी सातत्याने संपर्क ठेवण्याबाबत मौलिक विचार मांडले. त्यांच्या मार्गदर्शनामुळे उपस्थित कार्यकर्त्यांमध्ये उत्साहाचे वातावरण निर्माण झाले.यावेळी प्रतिक्रिया व्यक्त करताना नगराध्यक्ष अशोकभाऊ परळीकर म्हणाले,”माझ्या जनसंपर्क कार्यालयाचे उद्घाटन पालकमंत्री दत्तामामा भरणे यांच्या शुभहस्ते झाले. मामांनी आवर्जून उपस्थित राहून मार्गदर्शन केले तसेच पक्षबांधणीबाबत अत्यंत मौलिक विचार मांडले. त्यांनी आपला अमूल्य वेळ दिल्याबद्दल मी त्यांचा मनःपूर्वक आभारी आहे.”“माझ्यावर जिवापाड प्रेम करणाऱ्या आणि माझ्या सुख-दुःखात सदैव खंबीरपणे सोबत राहणाऱ्या माझ्या परिवाराचे, तसेच राष्ट्रवादी काँग्रेस पक्षासाठी कट्टरपणे काम करणाऱ्या आणि स्वर्गीय अजितदादांवर मनापासून प्रेम करणाऱ्या सर्व पदाधिकारी व कार्यकर्त्यांचेही मी मनःपूर्वक आभार मानतो,” असेही परळीकर यांनी सांगितले.“आपल्यापेक्षा पक्ष मोठा” या विचाराने काम करणाऱ्या प्रत्येक राष्ट्रवादी कार्यकर्त्यामुळेच पक्षाची खरी ताकद दिसून येते. ही ताकद पदांमध्ये नव्हे, तर आपण कमावलेल्या माणसांमध्ये असते, असे मतही अशोकभाऊ परळीकर यांनी व्यक्त केले.जनतेच्या सेवेसाठी सुरू करण्यात आलेल्या या जनसंपर्क कार्यालयाच्या उद्घाटनाला मंगरुळपीर शहरातील नागरिकांनी मोठ्या संख्येने उपस्थित राहून दिलेले प्रेम, आशीर्वाद आणि पाठिंबा याबद्दलही त्यांनी सर्वांचे मनापासून आभार मानले. आगामी काळात नागरिकांच्या अडचणी, नागरी सुविधा, विकासकामे आणि शासकीय योजनांशी संबंधित प्रश्न सोडविण्यासाठी हे कार्यालय प्रभावी माध्यम ठरेल, असा विश्वास यावेळी व्यक्त करण्यात आला.
