राज्य गुणवत्ता यादीत चमकलेल्या विद्यार्थ्यांचा जिल्हाधिकारी कार्यालयात गौरव
सेलू : महाराष्ट्र राज्य परीक्षा परिषदेतर्फे घेण्यात आलेल्या शिष्यवृत्ती परीक्षेत राज्य गुणवत्ता यादीत स्थान मिळवून उल्लेखनीय यश संपादन करणाऱ्या नूतन विद्यालय शिक्षण संस्था, सेलूच्या गुणवंत विद्यार्थ्यांचा स्वातंत्र्यदिनानिमित्त परभणी जिल्हाधिकारी कार्यालयात पालकमंत्री मेघना साकोरे-बोर्डीकर यांच्या हस्ते सत्कार करण्यात आला.
यामध्ये सौ. सावित्रीबाई बद्रीनारायणजी बिहाणी नूतन प्राथमिक शाळा, सेलू येथील समृद्धी जयकिशन भुतडा हिने राज्यात द्वितीय क्रमांक पटकावला. तसेच नूतन विद्यालयाचा तन्मय जयकिशन भुतडा याने राज्यात दहावा, तर सान्वी गजानन शितळे हिने चौदावा क्रमांक मिळवून विद्यालयाच्या शैक्षणिक गुणवत्तेचा ठसा राज्यस्तरावर उमटवला. या यशाबद्दल तिन्ही विद्यार्थ्यांचा पालकमंत्र्यांच्या हस्ते गौरव करण्यात आला.
पालकमंत्री मेघना बोर्डीकर यांनी गुणवंत विद्यार्थ्यांचे अभिनंदन करत भावी वाटचालीस शुभेच्छा दिल्या. हे यश विद्यार्थ्यांची मेहनत, सातत्यपूर्ण अभ्यास तसेच पालक व शिक्षकांच्या मार्गदर्शनाचे फलित असल्याचे त्यांनी नमूद केले. या वेळी विद्यार्थ्यांचे मार्गदर्शक शिक्षक विभागप्रमुख सुनील तोडकर, बाळू बुधवंत, प्रशांत सावरगावकर व अर्जुन पंडित उपस्थित होते.
कार्यक्रमास जिल्हाधिकारी संजयसिंह चव्हाण, जिल्हा पोलीस अधीक्षक पंकज कुमावत आणि जिल्हा परिषदेच्या मुख्य कार्यकारी अधिकारी नतिशा माथुर यांची प्रमुख उपस्थिती होती.
विद्यार्थ्यांच्या या यशाबद्दल नूतन विद्यालय शिक्षण संस्थेचे अध्यक्ष डॉ. सत्यनारायण लोया, उपाध्यक्ष डी. के. देशपांडे, सचिव डॉ. विनायकराव कोठेकर, सहसचिव जयप्रकाश बिहाणी, प्रशासकीय अधिकारी डॉ. शरद कुलकर्णी, शालेय समिती अध्यक्ष सिताराम मंत्री, मकरंद दिग्रसकर, कार्यकारिणी सदस्य नंदकिशोर बाहेती, मुख्याध्यापक किरण देशपांडे व एकनाथ जाधव यांच्यासह सर्व शिक्षक व शिक्षकेतर कर्मचाऱ्यांनी अभिनंदन केले.
