आमदार सईद खान यांच्या स्फोटक आरोपाने खळबळ
देशनिष्ठ प्रतिनिधी, पाथरी:- “पस्तीस वर्षांची दादागिरी, दहशत आणि लूट जनता दरबारात धुळीस मिळाली. त्यामुळेच आज माजी आमदारांची पोटदुखी चव्हाट्यावर आली आहे” असा स्फोटक आरोप आमदार सईद खान यांनी शनिवारी केला. स्वातंत्र्य दिनी शहरातील शिवसेना भवन येथे घेतलेल्या पत्रकार परिषदेत आ. खान यांनी माजी आमदार तथा स्वीकृत नगरसेवक बाबाजानी दुर्रानी यांच्यावर २४३ कोटी रुपयांच्या महाभ्रष्टाचाराचे थेट आरोप करत “पुरावे शासनाकडे दिले आहेत. लवकरच यांना जेलची हवा खावी लागणार” असा इशारा दिला.
“३६ एकरचे १२०० एकर कसे झाले?”
नगरपरिषदेत ८ कोटी ११ लाखांचा घोटाळा झाल्याचा आरोप करत काँग्रेसच्या माजी आमदारांनी उपोषण सुरू केल्यानंतर आ. खान यांनी पलटवार केला.”ज्या व्यक्तीकडे सत्तेत येण्यापूर्वी फक्त ३६ एकर जमीन होती, आज त्यांच्याकडे १२०० एकर जमीन कोठून आली? याची चौकशी झालीच पाहिजे. माजी आ. दुर्रानी खुनाच्या आरोपात ९ महिने जेलमध्ये होते. आता भ्रष्टाचाराच्या आरोपातूनही सुटका नाही” असे आ. खान म्हणाले.२४३ कोटींच्या लूटीचा चिट्ठा वाचून हादराल आ. खान यांनी एक-एक प्रकरण उघड करताना शिवसेना भवन हादरवले
* बैकार मोहल्ला येथील २ एकर कब्रस्थानची जागा बळकावली. किंमत २० कोटी. * न प समोरील विलास माथेले यांची २० कोटींची मौल्यवान जागा हडपली. * मुख्य रस्त्यावरील दुकाने जाळून राख केली. मूळ दुकानदारांना डावलले. रेडीमेड व्यापारी सिद्दीकी, अन्सारी आजही बेघर. * इंदिरा नगर येथील ईदगाहच्या अर्ध्या जागेत इमारत आणि उर्वरित २ एकरचे प्लॉट पाडून विक्री. * हुले सावकाराची जागा हडप करून त्यावर दुकाने बांधून विकली. * नगरपरिषदेला दान दिलेली गायवाड्याची जागा स्वतःच्या ताब्यात. * फक्राबाद येथील अंगणवाडीची जागा शाळेऐवजी खाजगींना भाड्याने दिली. * मानवत येथील अन्सारी बिरादारीच्या महिलांना डोळ्यात मिरची पावडर टाकून मारहाण करून त्यांची जागा बळकावली. * मुंबईचे आसेफ खान यांची हायवे लगतची जागा बाप-लेकांनी बळकावली. * सर्विस रोडवर बेकायदा बाबा टॉवर. पाण्याच्या टाकीमागील लिंगायत समाजाची २ एकर जागा हडपून प्लॉटिंग. * पाणीपुरवठा घोटाळा २५ कोटींच्या योजनेत अवघे ४-५ कोटींचे काम. २ फिल्टरऐवजी १ च उभा केला. उर्वरित निधी लाटला. अनेक कंत्राटदारांची लाखो रुपयांची देणी बुडवून त्यांना देशोधडीला लावले.”या सर्व प्रकरणांचे नगरविकास खात्यामार्फत रि-ऑडिट सुरू आहे. काही प्रकरणात एसआयटी देखील बसली आहे. या महाभ्रष्टाचारात बाबाजानी दुर्रानी दोषी सिद्ध होणार आणि त्यांना जेलमध्ये जावेच लागेल” असा ठाम विश्वास आ. खान यांनी व्यक्त केला.
“जि.प. शाळा बांधकामात १ कोटींचा घोटाळा केला” असा नवा आरोप नगराध्यक्ष आसेफ खान यांनी केला. उपनगराध्यक्ष अलोक चौधरी म्हणाले “विकासाला साथ देण्याऐवजी विरोधासाठी विरोध केला जातो. यांच्याच दहशतीमुळे कायमस्वरूपी मुख्याधिकारी येत नाहीत. त्यामुळे कर्मचाऱ्यांचे पगार लांबतात.””आम्ही प्रधानमंत्री आवास आणि इंदिरा आवास योजनेचे ५०० हून अधिक लाभार्थ्यांना घरे दिली. पूर्वी हे लोक जाणीवपूर्वक गरीबांच्या नावाची अडवणूक करत होते” असा आरोपही चौधरी यांनी केला.शेवटी आ. सईद खान म्हणाले “जनतेने पस्तीस वर्षांची हुकूमशाही उलथवली. माझ्या कुटुंबाला जिल्हा बँकेची २ संचालक पदे मिळाली म्हणूनच यांची जळजळ होते. पण आता पाथरीकर जागा झाला आहे. लूटीचा हिशोब द्यावाच लागेल.”
या पत्रकार परिषदेला नगराध्यक्ष आसेफ खान, उपनगराध्यक्ष अलोक चौधरी, गोविंद हारकाळ, मुंजाजी भाले पाटील, लालू खान, मुंजाभाऊ नाना टाकळकर यांच्यासह शिवसेनेचे पदाधिकारी उपस्थित होते.
