जर्मनीतील संसद भवनाचे वास्तुशिल्पीय सौंदर्य टिपले कॅमेऱ्यात
देशनिष्ठ प्रतिनिधी, नांदेड : वास्तुशिल्पाकडे पाहण्याची वेगळी दृष्टी, प्रकाश-छायांचा कलात्मक वापर आणि छायाचित्रणातील कल्पकतेच्या जोरावर जर्मनी येथे वास्तव्यास असलेल्या नांदेड येथील आर्किटेक्ट शिवानी प्रतिक बाहेती-मानधने यांनी राष्ट्रीय स्तरावर नांदेडचे नाव उज्ज्वल केले आहे. ‘शी डिझाईन्स’ राष्ट्रीय वास्तुशिल्प स्पर्धा २०२६ मधील वास्तुशिल्प छायाचित्रण विभागात त्यांनी प्रथम क्रमांकाचा पुरस्कार पटकावला.
सुनिता महेश बाहेती यांच्या स्नुषा आणि सारिका संतोष मानधने यांच्या कन्या असलेल्या शिवानी यांनी ‘द फ्री स्टँडिंग जिओमेट्री’ हे छायाचित्र स्पर्धेसाठी सादर केले होते. जर्मनीतील बर्लिन संसद संकुलाचे वास्तुशिल्पीय सौंदर्य त्यांनी वेगळ्या दृष्टिकोनातून कॅमेऱ्यात टिपले. वास्तूची रचना, अवकाश, प्रकाश, भूमिती आणि उभ्या रेषांचा प्रभाव या छायाचित्रनात प्रभावीपणे अधोरेखित करण्यात आला आहे.
विशेष म्हणजे, या छायाचित्रचे नवी दिल्ली येथे प्रत्यक्ष परीक्षांसमोर सादरीकरण व परीक्षण करण्यात आले. देशभरातील महिला व्यावसायिकांच्या सहभागाच्या या राष्ट्रीय स्तरावरील स्पर्धेत शिवानी यांच्या कलाकृतीला प्रथम क्रमांक मिळणे ही त्यांच्या सर्जनशीलतेची आणि वास्तुशिल्पीय जाणिवेची पावती मानली जात आहे. वेड एशियाच्या माध्यमातून वास्तुशिल्प, अंतर्गत सजावट, बांधकाम, भू-दृश्यरचना, कला आणि छायाचित्रण क्षेत्रातील महिलांच्या प्रतिभेला व्यासपीठ उपलब्ध करून दिले जाते.
या प्रतिष्ठित राष्ट्रीय मंचावरील पुरस्कारामुळे शिवानी यांच्या सर्जनशील कार्याला नवी ओळख मिळाली आहे. शिवानी बाहेती-मानधने यांच्या या उल्लेखनीय यशाबद्दल कुटुंबिय, मित्रपरिवार नांदेडकर आणि सेलू येथील शिवनारायण मालाणी आणि मालाणी कुटुंबीयाकडून अभिनंदन होत आहे.
