नूतन विद्यालय सेलू येथे राष्ट्रीय क्रीडा दिन उत्साहात; आंतरराष्ट्रीय व राष्ट्रीय खेळाडूंचा गौरव
सेलू, दि.२९ : येथील नूतन विद्यालयात २९ ऑगस्ट रोजी हॉकीचे जादूगार मेजर ध्यानचंद यांच्या जयंतीनिमित्त राष्ट्रीय क्रीडा दिन उत्साहात साजरा करण्यात आला. ‘खेलेगा भारत-जितेगा भारत’ या संकल्पनेतून आयोजित या सोहळ्यात आंतरराष्ट्रीय, राष्ट्रीय व राज्यस्तरीय खेळाडू तसेच क्रीडा प्रशिक्षकांचा मान्यवरांच्या हस्ते गौरव करण्यात आला.
कार्यक्रमाच्या अध्यक्षस्थानी नूतन विद्यालय शिक्षण संस्थेचे डॉ. एस. एम. लोया होते. प्रमुख पाहुणे म्हणून जिल्हा परिषद सदस्य डॉ. आशिष डख, पंचायत समिती सदस्य अनिरुद्ध नाईक, माजी नगराध्यक्ष विनोद बोराडे, जिल्हा संघटक दिनकर वाघ, तालुकाध्यक्ष गणेश काटकर, प्रशासकीय अधिकारी डॉ. शरद कुलकर्णी, प्रभारी मुख्याध्यापक डी. बी. घोगरे, पर्यवेक्षक एस. जी. बोधनापोड व जी. एस. माळवे यांची उपस्थिती होती.सुरुवातीला ‘खेळ खेळूया, देशाची शान वाढवूया’ या स्वागतगीताने व मेजर ध्यानचंद यांच्या प्रतिमेच्या पूजनाने कार्यक्रमाचा प्रारंभ झाला. प्रास्ताविक पर्यवेक्षक गणेश माळवे यांनी केले. याप्रसंगी ऑस्ट्रेलियातील आंतरराष्ट्रीय लॅक्रास स्पर्धेतील सहभागाबद्दल अजय नारायणराव चव्हाण यांचा, तर इंग्लंडमधील टेबल टेनिस वर्ल्ड कप स्पर्धेतील सहभागाबद्दल कु. आद्या महेश बाहेती हिचा विशेष सत्कार करण्यात आला. यासोबतच विविध खेळांमधील गुणवत्ताप्राप्त खेळाडू आणि प्रशिक्षकांनाही सन्मानित करण्यात आले.
खेळ हा केवळ मनोरंजनाचा विषय नसून विद्यार्थ्यांच्या सर्वांगीण व्यक्तिमत्त्व विकासासाठी अत्यंत महत्त्वाचा आहे. खेळामुळे शिस्त, संघभावना, नेतृत्वगुण, आत्मविश्वास आणि जिद्द निर्माण होते; त्यामुळे विद्यार्थ्यांनी खेळाला दैनंदिन जीवनात योग्य स्थान द्यावे, असे प्रतिपादन डॉ. आशिष डख यांनी केले.माजी नगराध्यक्ष विनोद बोराडे यांनी विद्यार्थ्यांनी शिक्षणासोबत खेळाच्या माध्यमातून देशाचे नाव उज्ज्वल करण्याचे आवाहन केले.
अध्यक्षीय भाषणात डॉ. एस. एम. लोया यांनी क्रीडा क्षेत्रातील संधींचा लाभ घेण्याचे मार्गदर्शन केले.कार्यक्रमाचे सूत्रसंचालन डॉ. काशीनाथ पल्लेवाड यांनी केले, तर आभार प्रदर्शन प्रशांत नाईक यांनी केले. यशस्वी आयोजनासाठी क्रीडा विभागप्रमुख प्रशांत नाईक, संजय भुमकर, शिक्षक, शिक्षकेतर कर्मचारी व विद्यार्थ्यांनी परिश्रम घेतले.
