शारदा विद्यालयात राष्ट्रीय क्रीडा दिन उत्साहात; कराटे प्रात्यक्षिकाने वेधले लक्ष
सेलू : सर्वांगीण प्रगतीसाठी अभ्यासाबरोबरच खेळही अत्यंत महत्त्वाचा असून खेळातून करिअर आणि नोकरीच्या अनेक संधी उपलब्ध होतात; त्यामुळे विद्यार्थ्यांनी मैदानावर प्रत्यक्ष खेळ खेळले पाहिजेत, असे आवाहन प्रतिष्ठित व्यापारी अनुप गुप्ता यांनी केले.
येथील कै. सौ. राधाबाई किशनराव कान्हेकर शारदा विद्यालयात राष्ट्रीय क्रीडा दिन व मेजर ध्यानचंद यांच्या जयंतीनिमित्त शनिवार, दिनांक २९ ऑगस्ट रोजी आयोजित कार्यक्रमात प्रमुख पाहुणे म्हणून ते बोलत होते. कार्यक्रमाच्या अध्यक्षस्थानी संस्थाध्यक्ष रामनाना पाटील होते. प्रमुख पाहुणे म्हणून माजी राष्ट्रीय खेळाडू माधव लोकुलवार, शिवनारायण मालाणी, शाखा प्रबंधक सचिन जैन उदगीरकर, संस्थेचे सहसचिव दीपक खराबे, संचालक प्रल्हादराव कान्हेकर, रविराज जाधव, अक्रूर काकडे, अमोल रोडगे, निखिल टोकर तसेच कराटे प्रशिक्षक भालचंद्र शिंदे व गायत्री वाकोडीकर आदींची उपस्थिती होती.
याप्रसंगी बास्केटबॉलचे माजी राष्ट्रीय खेळाडू माधव लोकुलवार यांच्यासह मान्यवरांचा संस्थाध्यक्ष रामनाना पाटील व प्रल्हादराव कान्हेकर यांच्या हस्ते सत्कार करण्यात आला. यावेळी माधव लोकुलवार यांनी शाळेसाठी व्हॉलीबॉल, नेट, लोखंडी पोल आदी क्रीडा साहित्य भेट देण्याचे जाहीर केले. तसेच कराटे प्रशिक्षक भालचंद्र शिंदे व गायत्री वाकोडीकर यांनी सादर केलेल्या कराटे व स्वसंरक्षणाच्या प्रात्यक्षिकांनी विद्यार्थ्यांचे लक्ष वेधून घेतले.
कार्यक्रमाचे प्रास्ताविक मुख्याध्यापक डी. डी. शिंदे यांनी केले. सूत्रसंचालन सुभाष मोहकरे यांनी केले, तर अभिमान पाईकराव यांनी आभार मानले. कार्यक्रमाच्या यशस्वीतेसाठी मुख्याध्यापिका यु. बी. कामठे, अर्चना पठारे-फोपसे, आनंद देवधर, संदीप जुमडे, सोमेश शिंदे, चैतन्य नावाडे, पवार, तरटे, चव्हाण, नानासाहेब भदर्गे, विजय अंभुरे, भारती मुळे, साडेगावकर व राणीबाई फुलारी आदींनी परिश्रम घेतले.
