भारतीय शिक्षण प्रसारक संस्थेचा अमृत महोत्सव व क्रीडा दिनानिमित्त विवेकानंद प्राथमिक विद्यालयाचा उपक्रम
सेलू : भारतीय शिक्षण प्रसारक संस्था, अंबाजोगाईच्या अमृत महोत्सवी वर्षानिमित्त तसेच मेजर ध्यानचंद यांच्या जयंतीनिमित्त राष्ट्रीय क्रीडा दिनाचे औचित्य साधून विवेकानंद प्राथमिक विद्यालय, सेलू यांच्या वतीने आयोजित ‘अमृत दौड’ उपक्रमाला शनिवार, दिनांक २९ ऑगस्ट रोजी तरुणाईचा उत्स्फूर्त प्रतिसाद मिळाला. निरोगी जीवनशैली, व्यायामाची आवड आणि सामाजिक बांधिलकीचा संदेश देण्यासाठी या दौडीचे आयोजन करण्यात आले होते.
मंठा रोड ते बोर्डीकर कृषी महाविद्यालय या मार्गावर सकाळी ७ वाजता जिल्हा परिषदेचे माजी गटनेते तथा उद्योजक रामनाना खराबे (पाटील), उपजिल्हा रुग्णालयाचे वैद्यकीय अधीक्षक डॉ. संजय हरबडे आणि स्थानिक कार्यवाह उपेंद्र बेल्लूरकर यांच्या हस्ते झेंडा दाखवून दौडला सुरुवात करण्यात आली. ‘चला धावूया, निरोगी राहू या’ हा संदेश देत सहभागी धावपटूंनी उत्साहपूर्ण वातावरणात दौड पूर्ण केली.
या स्पर्धेत मुलांच्या गटात परभणीच्या कुमार डिफेन्स अकॅडमीचा आदित्य गणेश कुऱ्हे (प्रथम), मुंजाजी नामदेव अमोघे (द्वितीय) तर गटकळ करिअर अकॅडमी सेलूचा अर्जुन विलास राठोड (तृतीय) यांनी यश मिळवले. मुलींच्या गटात गटकळ करिअर अकॅडमी सेलूच्या पल्लवी प्रल्हाद माने (प्रथम), कुसुम बाळू आढे (द्वितीय) तर राधा ज्ञानेश्वर गवळी (तृतीय) यांनी क्रमांक पटकावला. विजेत्यांना डॉ. रवींद्र घोडके व डॉ. दिगंबर घोडके यांच्यातर्फे पारितोषिके देण्यात आली.
या दौडसाठी गणेश माळवे, संजय भुमकर, सुभाष मोहकरे यांनी पंच म्हणून काम पाहिले. गटकळ करिअर अकॅडमीचे गोरखनाथ राऊत, योगेश राठोड तसेच कमांडो करिअर अकॅडमीचे सचिन काकडे, सतीश जाधव, पोलीस प्रशासन व आरोग्य विभागाने सहकार्य केले. दौडीनंतर स्पर्धकांना फळे वाटप करण्यात आले.कार्यक्रमाचे प्रास्ताविक नामदेव एकशिंगे यांनी केले. सूत्रसंचालन विजय चौधरी यांनी, बक्षीस यादी वाचन गजानन साळवे यांनी, तर अनिल कौसडीकर यांनी आभार मानले. कार्यक्रम यशस्वी करण्यासाठी क्रीडा उपक्रम समिती प्रमुख दीपाली पवार व शिक्षक-कर्मचाऱ्यांनी परिश्रम घेतले.
