देवगावफाटा शिवारातील लिंबाच्या झाडाला गळफास; खिशात चिठ्ठी आढळली
देवगावफाटा : मराठा आरक्षणाचा प्रश्न मार्गी लागत नसल्याच्या नैराश्यातून सेलू तालुक्यातील देवगावफाटा येथील एका युवकाने शेतशिवारातील लिंबाच्या झाडाला गळफास घेऊन आत्महत्या केल्याची घटना शनिवारी, २९ ऑगस्ट रोजी सकाळी सहाच्या सुमारास उघडकीस आली. जगन्नाथ उत्तमराव मोरे (वय ३५, रा. देवगावफाटा, ता. सेलू, जि. परभणी) असे मृत युवकाचे नाव आहे. त्याच्या खिशात चिठ्ठी आढळून आली असून, त्यात मराठा आरक्षण मिळत नसल्यामुळे आत्महत्या करीत असल्याचा उल्लेख असल्याची माहिती पोलिसांनी दिली.
जगन्नाथ मोरे हे मागील काही दिवसांपासून मराठा आरक्षणाच्या प्रश्नावरून चिंतेत व निराश असल्याचे नातेवाइकांनी सांगितले. मनोज जरांगे पाटील यांच्या नेतृत्वाखाली आंदोलने होऊनही आरक्षणाचा प्रश्न अद्याप निकाली लागत नसल्याची खंत ते व्यक्त करीत होते, असेही नातेवाइकांनी सांगितले. दरम्यान, शनिवारी सकाळी सहाच्या सुमारास देवगावफाटा शिवारातील एका लिंबाच्या झाडाला गळफास घेतलेल्या अवस्थेत जगन्नाथ मोरे आढळून आले.
घटनेची माहिती मिळताच चारठाणा पोलिस ठाण्याचे सहाय्यक पोलिस निरीक्षक बालाजी पुंड, आर. एम. कोंडरे, रविकुमार मगरे यांनी घटनास्थळी धाव घेत पंचनामा केला. यावेळी मृताच्या खिशात एक चिठ्ठी आढळून आली. त्यामध्ये मराठा आरक्षण मिळत नसल्यामुळे आत्महत्या करीत असल्याचा उल्लेख असल्याचे पोलिसांनी सांगितले. या प्रकरणी चारठाणा पोलिस ठाण्यात मराठा आरक्षणाच्या मागणीसाठी आत्महत्या केल्याची नोंद करण्यात आली आहे. जगन्नाथ मोरे यांच्या पश्चात पत्नी, मुलगा, मुलगी, आई, भाऊ व भावजयी असा परिवार आहे.फोटो ओळ मयत जगन्नाथ उत्तमराव मोरे.
