नेहरू सेंटरमध्ये रंगणार ‘काका’ यांच्या चित्रांचे प्रदर्शन
परभणी : मुंबईच्या कलाविश्वात परभणीचा नावलौकिक वाढवणारे प्रसिद्ध चित्रकार काका सुशील कुमार एन. जी. यांच्या कलाकृतींचे मुंबईत प्रदर्शन भरवले जात आहे. नामांकित कला संस्था ‘रोमार्टिका’ आयोजित ‘कलर व्हील’ या भव्य समूह चित्र प्रदर्शनासाठी त्यांची निवड झाली आहे.या प्रतिष्ठित प्रदर्शनात त्यांच्या निवडक कलाकृती मांडण्यात येणार आहेत.
प्रदर्शनाच्या पोस्टरवर झळकणारे मुंबईच्या पावसाळी संध्याकाळचे, गेट वे ऑफ इंडिया आणि छत्रपती शिवाजी महाराज टर्मिनस परिसराचे चित्र त्यांच्या अप्रतिम चित्रशैलीची साक्ष देते. रंगांचा जिवंत वापर तसेच प्रकाश आणि सावलीचा देखणा खेळ हे त्यांच्या चित्रांचे प्रमुख वैशिष्ट्य राहिले आहे.हे प्रदर्शन मुंबईतील वरळी येथील नेहरू सेंटर आर्ट गॅलरीमध्ये १ सप्टेंबर ते ७ सप्टेंबर २०२६ या कालावधीत आयोजित करण्यात आले आहे. या प्रदर्शनात देशभरातील अनेक दिग्गज चित्रकार सहभागी होत असून, त्यात स्थान मिळणे ही त्यांच्या आजवरच्या कलासाधनेची पोचपावती मानली जात आहे. प्रत्येक प्रदर्शनात नेहमीच्या चित्रांऐवजी नवनवीन कलाकृती रसिकांसमोर मांडण्याची त्यांची खासियत आहे. ग्रामीण भागातून येत मुंबईच्या मुख्य कलादालनात आपले स्थान पक्के करणे ही सर्व परभणीकरांसाठी अभिमानाची बाब ठरत आहे.
