ज्ञानेश्वरी फिरता पारायण सांगता सोहळ्यानिमित्त आयोजन; ७०० पेक्षा अधिक रुग्णांनी घेतला लाभ
सेलू : ज्ञानेश्वरी फिरता पारायण सांगता सोहळ्याच्या निमित्ताने सेलू येथील श्री नरसिंह आयुर्वेदचे डॉ. मंथन लोकुलवार यांच्या टीमच्या वतीने सोमवारी व मंगळवारी (१६ व १७ मार्च) आयोजित मोफत आयुर्वेदिक चिकित्सा शिबिरास रुग्णांचा उत्स्फूर्त प्रतिसाद मिळाला. या शिबिरामध्ये ७७० पेक्षा अधिक रुग्णांनी आपली आरोग्य तपासणी करून घेतली असून त्यांच्यावर आवश्यक उपचार करण्यात आले आहेत.
या शिबिरामध्ये आयुर्वेदातील विद्धकर्म व अग्निकर्म या अत्यंत प्रभावी उपचार पद्धतींद्वारे विविध व्याधींवर उपचार करण्यात आले. यामध्ये प्रामुख्याने वाताचे आजार, गुडघेदुखी, कंबरदुखी, मानदुखी आणि डोकेदुखी यांसारख्या समस्यांनी त्रस्त असलेल्या रुग्णांना दिलासा मिळाला. तसेच पोटाचे आजार, मुतखडा आणि इतर अनेक जुनाट आजारांवर तज्ज्ञ डॉक्टरांनी सखोल तपासणी करून औषधोपचार केले. या आरोग्य सेवेमध्ये तज्ज्ञ डॉक्टरांनी आपले योगदान दिले. यामध्ये डॉ. मंथन लोकुलवार, डॉ. प्रशांत कसबे, डॉ. अश्विनी सोपान राऊत, डॉ. पद्मश्री गोन्नाडे, डॉ. अंजली तिरमखे, डॉ. राधिका शिंदे, डॉ.कामाक्षा खंडारे, डॉ.वैष्णवी जयस्वाल, डॉ. प्रतिभा धुलगंडे, डॉ. आदित्य कुलकर्णी, डॉ. जागृती कुलकर्णी, डॉ.कपिल ब्राह्मणकर डॉ.कृष्णा खरात आणि डॉ. कोमल डोंगरे यांचा समावेश होता. हर्षल पाटील, अमित लहाने, राजन पवार, वरूण राठोड यांनी त्यांना साहाय्य केले. आध्यात्मिक सोहळ्यासोबतच सामाजिक बांधिलकी जपत राबवण्यात आलेल्या या आरोग्य उपक्रमाचे शिवाजी महाराज खवणे, कृष्णा महाराज, माजी नगराध्यक्ष विनोद बोराडे, हेमंतराराव आडळकर, माधव आण्णा लोकुलवार, अविनाश बिहाणी, प्राचार्य डॉ.शरद कुलकर्णी आदींसह मान्यवरांनी शिबिरस्थळी भेट देऊन उपक्रमाचे कौतुक केले.
